Ainaru manán Manufahi 2-0, Baukau lolo Aileu 7-1

DILI, 19 Novembru 2026 (TATOLI)—Ekipa futeból Ainaro manan Manufahi ho rezultadu 2-0, enkuantu Baukau lolo Aileu ho rezultadu 7-1 iha jogu Festivál Nasionál Desportu (FND) 2026, ne’ebé hala’o iha Estádiu Munisipál Dili, kuarta kalan ne’e.
Iha jogu dahuluk, Ainaru hasoru Manufahi lori ekipa rua lansa kontra-atake ba malu hodi buka golu dahuluk, maibé Ainaru ne’ebé lidera husi treinadór Eduardo Pereira lansa atake ho másimu.
Iha minutu 14, Delfin Reno marka golu dahuluk hodi lori Ainaru lidera 1-0. Manufahi responde ho kontra-atake ne’ebé lais atu prodús golu maibé Ainaru konsege hamate Manufahi nia jogu. To’o primeira parte termina, Ainaru mantein vitoria provizóriu 1-0.
Tama ba segunda parte, Ainaru domina liu bola kompara ho Manufahi no monu iha minutu 77, Carol de Araújo simu bola husi liña klaran no dudu bola tama ba rede Manufahi nian, hodi muda rezultadu ba 2-0.
To’o jogu termina, laiha tan golu entaun ekipa Ainaru xave pontu tolu (3), enkuantu Manufahi hela ho pontu zero.
Hafoin jogu ramata, Treinadór Ainaro, Eduardo Pereira, afirma katak maioria jogadór ne’ebé integra ekipa ne’e nia koñese ona, tanba sira barak hela iha Dili hodi kontinua eskola.
“Kondisaun ne’e fasilita ha’u atu organiza ekipa no prepara jogadór sira ba kompetisaun,” Eduardo Pereira dehan.
Nia esplika, tanba nia koñese ona kapasidade jogadór sira, la presiza tempu naruk atu fó treinamentu intensivu. Rezultadu ne’ebé ekipa hetan sai motivasaun atu kontinua prepara an ba jogu tuir mai.
Eduardo Pereira mós rekoñese katak Manufahi mai ho jogadór sira-ne’ebé iha kualidade, tanba maioria husi sira mak jogadór Primeira Divizaun.
“Maibé ohin ami hetan sorte di’ak, nune’e konsege hetan pontu tolu atu kontinua ba faze tuir mai,” nia afirma.
Nia sei kontinua fó orientasaun ba jogadór sira atu mantein treinamentu no hadi’a preparasaun, hodi enfrenta Munisípiu Vikeke iha jogu tuir mai.
Ba kompetisaun ne’e, Munisípiu Ainaru mai ho jogadór hamutuk na’in 25, maibé maioria husi sira hela iha Dili tanba kontinua eskola iha kapitál.
Baukau Manán Aileu 7-1
Iha jogu daruak, Baukau hatudu nia superioridade hodi manán Aileu 7-1. Iha primeira parte, Baukau loke uluk golu dahuluk liu husi Mario Donasio iha minutu hitu (7), hodi muda rezultadu ba 1-0. Iha minutu 19, Denilson Almeida aumenta golu daruak ba 2-0. Iha minutu 23, Elvis de Almeida aumenta tan golu ba 3-0, ne’ebé mantein to’o primeira parte termina.
Hakat ba segunda parte, Aileu tenta buka atu hatama golu, maibé Baukau la fó fatin. Iha minutu 53, Alexadre Moreira marka golu dahaat ba 4-0. Iha minutu 65, José Moreira aumenta golu dalima ba 5-0.
Iha minutu 80, Baltar prodús golu dahuluk ba Aileu hodi muda rezultadu ba 5-1. Maibé iha minutu 85, Alexadre responde hikas golu ida hodi muda rezultadu ba 6-1. Iha minutu 90+5, Santonio Cabral marka golu dahitu hodi termina jogu ho 7-1.
Hafoin jogu, Treinadór Baukau, Mateus da Silva, afirma katak preparasaun ekipa nian la’o di’ak, maski hasoru obstákulu tanba jogadór balun hela iha Dili no balun seluk iha Baukau.
“Haree husi preparasaun ami di’ak, enkuantu haree ba materia jogadór, kuaze ami ho Aileu nia materia jogadór hanesan, maibé dalaruma Aileu nia preparasaun ladun másimu, nune’e ami mak iha vantajen hodi manan sira,” Mateus da Silva dehan ba jornalista sira iha Estádiu Munisipál Dili, kuarta kalan.
Iha biban hanesan, Kapitaun Baukau, Zito Moreira, hato’o agradesimentu ba jogadór sira hotu tanba servisu hamutuk ne’ebé konsege lori ekipa hetan ona pontu tolu.
“Ohin ami manan, maibé ami sei halo preparasaun ho intensidade másimu liután atu hasoru ekipa Munisípiu Manatuto iha jogu tuir mai,” Zito Moreira dehan.
Nia konsidera Manatuto nu’udar ekipa forte, ne’ebé labele subestima. Tanba ne’e, ekipa Baukau sei hadi’a tan preparasaun atu bele enfrenta adversáriu ho di’ak.
Jornalista : Hortêncio Sanchez
Editór : Cancio Ximenes

