Top

OJE 2027 aloka millaun US$26,4 ba FDCH, finansia bolsa estudu ba estudante 903

Diretór Ezekutivu FDCH, Júlio Aparício. Imajen TATOLI/Francisco Sony

DILI, 19 Novembru 2026 (TATOLI)—Fundu Dezenvolvimentu Kapitál Umanu (FDCH-sigla portugeza) sei simu alokasaun orsamentu millaun US$26,4 husi Orsamentu Jerál Estadu (OJE) 2027, atu finansia programa bolsa estudu ba estudante na’in-903 no dezenvolvimentu institusionál.

Diretór Ezekutivu FDCH, Júlio Aparício, hateten katak estudante na’in-903 ne’ebé sei simu bolsa estudu iha 2027 sei fahe ba modalidade haat, mak estájiu profisionál, subsídiu individuál, bolsa parsiál no bolsa méritu.

“Ba programa bolsa estudu, sei atribui ba estudante hamutuk 903, ne’ebé sei fahe ba modalidade haat, mak hanesan estájiu profisionál, subsídiu individuál, bolsa parsiál no bolsa méritu,” Diretór Ezekutivu FDCH, Júlio Aparício, dehan ba TATOLI iha nia kna’ar-fatin, Kolmera, Kinta ne’e.

Husi totál orsamentu US$26.428.857, montante US$24.006.792 aloka ba Programa Bolsa Estudu, liuhusi Sub-programa Dezenvolvimentu Kapasitasaun Rekursu Umanu, ho atividade bolsa estudu iha área estratéjika.

Enkuantu, Programa Funsionamentu no Dezenvolvimentu Institusionál simu alokasaun ba atividade tolu, mak hanesan Jestaun Finanseira ho montante US$1.473.409,14; Planeamentu, Monitorizasaun no Estatístika ho US$889.655,86; no Kapitál Menór ho US$59.000.

Aparício esplika katak programa estájiu profisionál ne’e destina ba bolseiru sira-ne’ebé ramata ona estudu superiór, atu fó oportunidade ba sira hala’o estájiu durante fulan neen. Área estudu ne’ebé sai prioridade mak edukasaun, agrikultura, indústria, enjeñaria, teknolojia informasaun, direitu, turizmu, ospitalidade no saúde.

Nia hatutan katak alokasaun orsamentu ba FDCH sei kontinua tuir prioridade Planu Governu Dasiak, ho foku ba nesesidade dezenvolvimentu rekursu umanu iha nasaun, liuliu iha setór sira-ne’ebé presiza profisionál ho kualifikasaun.

Tuir planu FDCH, bolseiru sira sei kontinua sira-nia estudu iha nasaun hanesan Indonézia, Malázia, Tailándia, Filipina, Repúblika Koreia no Japaun.

Diretór Ezekutivu FDCH ne’e mós esplika katak númeru bolseiru 903 inklui ona benefisiáriu sira husi liña ministeriál. Ba funsionáriu públiku, orsamentu bolsa estudu sei aloka liuhusi Institutu Nasionál Administrasaun Públika (INAP), enkuantu orsamentu ba benefisiáriu sira seluk sei jere diretamente husi FDCH.

Nia mós hateten katak oportunidade bolsa estudu ne’e hahú husi nivel Diploma III to’o Doutoramentu.

Aparício informa katak durante nia mandatu, hahú husi 2024 to’o 2026, FDCH fó ona bolsa estudu ba ema hamutuk millaun ida, inklui bolsa parsiál no bolsa méritu.

Nia subliña katak orsamentu ne’e mak osan povu nian, tanba ne’e benefisiáriu sira tenke uza oportunidade ne’e ho responsabilidade no aproveita didi’ak atu hetan koñesimentu no abilidade ne’ebé bele kontribui ba dezenvolvimentu nasaun.

“Nune’e, iha oportunidade ida-ne’e, ha’u hakarak husu ba joven sira, liuliu jerasaun foun, atu estuda maka’as no aproveita oportunidade ne’e ho didi’ak, hodi kontinua dezenvolve ita-nia rai bá-oin,” nia dehan.

Aleinde programa bolsa estudu jerál, FDCH mós kontinua fó apoiu bolsa estudu ba sobrevivente sira, inklui ema ho defisiénsia, atu garante katak sira hetan oportunidade hanesan atu kontinua sira-nia estudu.

“Ita hahú husi 2024 to’o agora, númeru benefisiáriu sobrevivente sira-ne’e atinje ona ema na’in-70 resin,” nia tenik.

Júlio esplika katak orsamentu ba programa bolsa estudu ba sobrevivente sira aloka liuhusi Komisaun Nasionál ba Sobrevivente, ne’ebé iha responsabilidade atu jere prosesu finansiamentu.

Nia enkoraja benefisiáriu sira atu uza apoiu ne’e ho responsabilidade, tanba osan ne’e maihusi povu no tenke aproveita atu dezenvolve koñesimentu no kapasidade, hodi bele fó kontribuisaun ba komunidade.

“Maibé, labele tanba sobrevivente sira hetan oportunidade ne’e, depoiz la prepara an. Osan ne’e povu nian no ema hotu nian, entaun ita hotu tenke aproveita ho di’ak, estuda duni no aprende buat ruma atubele ajuda fali ema seluk,” nia konklui.

Kontestu

Fundu Dezenvolvimentu Kapitál Umanu (FDCH) kontinua sai mekanizmu importante ba Governu Timor-Leste atu investe iha dezenvolvimentu rekursu umanu, liuhusi finansiamentu programa bolsa estudu, formasaun profisionál no hasa’e kapasidade rekursu umanu iha área estratéjika sira.

Iha tinan 2026, FDCH hetan alokasaun orsamentu US$20.615.860. Husi montante ne’e US$18.771.722 destina ba programa bolsa estudu, ne’ebé inklui benefisiáriu na’in-5.919.

Iha tinan 2027, Governu kontinua fó prioridade ba dezenvolvimentu rekursu umanu, ho alokasaun orsamentu US$26.428.857 ba FDCH, hodi apoia programa bolsa estudu no dezenvolvimentu institusionál.

Investimentu ne’e importante atu prepara profisionál sira ho kualifikasaun iha área estratéjika, nune’e bele kontribui ba dezenvolvimentu ekonómiku no sosiál Timor-Leste.

 Klik notísia relevante sira iha kraik hodi lee:

  1. Atrazu pagamentu propina bolseiru afeta ezekusaun orsamentu FDCH
  2. FDCH kontinua prioriza programa bolsa estudu iha 2026
  3. Governu investe ona millaun $750 ba dezenvolvimentu infraestrutura dezde 2023
  4. Governu aprova proposta OJE 2027 ho montante biliaun $2.568
  5. CNC-FDCH selebra formalidade atribui bolsu estudu ba oan sira hosi sobrevivente

Jornalista: Osória Marques

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!