Bee menus, difikulta konstrusaun estrada betaun PNDS kilómetru 1,8 iha Suku Ahik

VIKEKE, 18 Novembru 2026 (TATOLI)—Menus bee tanba bailoron naruk sai obstákulu ba konstrusaun estrada betaun ho distánsia kilómetru 1,8, ne’ebé Programa Nasionál Dezenvolvimentu Suku (PNDS) implementa iha Suku Ahik, Postu Administrativu Lakluta, Munisípiu Vikeke. To’o agora, obra ne’e foin atinje 40%.
Xefe Suku Ahik, Ercílio Soares, hateten katak PNDS ba tinan 2026, autoridade suku hamutuk ho komunidade deside fó prioridade ba konstrusaun estrada betaun husi Aldeia Ali-Oan liga bá Suku Ahik, hodi fasilita movimentu komunidade.
“Programa PNDS ba tinan 2026, ami iha Suku Ahik fó prioridade ba estrada ne’ebé liga husi Aldeia Ali-Oan ba Suku Ahik. Agora, badaen lokál sira kontinua hala’o konstrusaun estrada betaun ne’e, maibé difikuldade ne’ebé sira enfrenta mak menus bee atu kahur simente. Traballadór sira tenke bá kuru bee iha fatin dook mak bele uza ba servisu konstrusaun,” Ercílio Soares dehan ba TATOLI iha Postu Administrativu Uatukarbau, Kuarta ne’e.
Autoridade komunitária ne’e esplika katak obra PNDS ne’e implementa iha Aldeia Ali-Oan, ho distánsia totál kilómetru 1,8 no luan estrada ne’ebé sei presiza konfirmasaun.
Nia subliña katak autoridade suku kontinua akompaña no monitoriza prosesu konstrusaun ne’e atu asegura servisu la’o tuir planu. To’o agora, progresu fíziku foin atinje 40%, rezultadu husi konstrusaun ezgotu bee no parte balun estrada ne’ebé hahú ona cor betaun.
“Autoridade suku sempre akompaña servisu konstrusaun ne’ebé badaen lokál sira hala’o,” nia subliña.
Ercílio Soares hatutan katak menus bee sai dezafiu prinsipál ba traballadór sira durante prosesu konstrusaun, tanba agora tama ona tempu bailoron. Ho situasaun ne’e, komunidade presiza aluga karreta hodi kuru no transporta bee ba fatin konstrusaun.
“Obra ne’e kontinua la’o, maibé dezafiu mak bee. Maski nune’e, ami kontinua akompaña servisu atubele konklui obra ne’e, hodi fasilita movimentu komunidade husi aldeia bá suku. Durante tempu udan, dalan ne’e difikulta tebes motorizada no karreta. Tanba ne’e, ami konstrui estrada ho betaun atu komunidade bele asesu ho di’ak durante tempu udan,” nia hato’o.
Nia dehan katak estrada betaun ne’e sei benefísia diretamente uma-kain 60, ho populasaun ema na’in-200 iha Aldeia Ali-Oan. Estrada ne’e mós sei fó benefísiu ba komunidade seluk iha Suku Ahik, ne’ebé iha uma-kain hamutuk 304 ho populasaun ema na’in-2.004 resin.
Ba implementasaun obra ne’e, PNDS aloka ona orsamentu hamutuk US$24.000, no konstrusaun hala’o husi badaen lokál sira iha Aldeia Ali-Oan.
Kontestu
Programa Nasionál Dezenvolvimentu Suku (PNDS) kontinua implementa projetu infraestrutura iha munisípiu sira, hodi hadi’a asesibilidade no fasilita movimentu komunidade iha área rurál. Iha Munisípiu Vikeke, PNDS implementa projetu hamutuk 77 iha tinan 2026, ho alokasaun orsamentu liu millaun US$1.
Projetu sira ne’e inklui konstrusaun no reabilitasaun infraestrutura bázika, hanesan estrada, ne’ebé konsidera importante atu liga komunidade rurál ho sentru suku no asesu bá servisu públiku.
Klik notísia relevante sira iha kraik hodi lee:
- https://tatoli.tl/2026/11/13/pnds-vikeke-relata-progresu-obra-fizika-projetu-77-atinje-progresu/
- 2. https://tatoli.tl/2026/03/17/pnds-prioriza-konstrui-estrada-rural-iha-2026/
- https://tatoli.tl/2025/07/09/estrada-difikulta-povu-lakluta-lori-produtu-lokal-ba-merkadu/
- https://tatoli.tl/2025/08/28/loke-ona-kuotasaun-faze-daruak-ba-projetu-pnds-iha-suku-ahik/
Jornalista: Vitorino Lopes da Costa
Editór: Xisto Freitas da Piedade

