Izraél hakarak hametin kooperasaun ho Timor-Leste iha agrikultura, edukasaun no defeza

DILI, 18 Novembru 2026 (TATOLI)—Izraél manifesta interese atu hametin no dezenvolve kooperasaun bilaterál ho Timor-Leste iha área agrikultura, edukasaun no defeza, hodi kontribui ba resposta ba nesesidade no prioridade dezenvolvimentu nasaun nian.
Embaixadór Izraél iha Timor-Leste, Yahel Vilan, hato’o interese ne’e durante enkontru ho Vise-Primeiru-Ministru no Ministru Koordenadór Asuntu Sosiál, no Ministru Dezenvolvimentu Rurál no Abitasaun Komunitária, Mariano Assanami Sabino, iha Palásiu Governu, Kuarta ne’e.
Iha enkontru ne’e, parte rua diskute no esplora potensialidade kooperasaun ne’ebé nasaun rua bele dezenvolve hamutuk iha futuru, liuliu iha setór sira-ne’ebé relevante ba prioridade Timor-Leste nian.
“Ha’u mai hasoru Vise-Primeiru-Ministru ho objetivu atu diskute kona-ba potensialidade saida mak ita bele halo kolaborasaun hamutuk iha futuru. Ha’u espera katak iha futuru ita bele dezenvolve kooperasaun iha área sira-ne’ebé tuir nesesidade Timor-Leste nian,” Embaixadór Izraél, Yahel Vilan, dehan.
Vilan hatutan katak diskusaun iha enkontru ne’e fó-atensaun espesífika ba área agrikultura, inklui oportunidade atu dezenvolve programa kooperasaun iha setór ne’e.
“Ami mós diskute kona-ba posibilidade atu harii programa interkámbiu entre estudante sira, no oportunidade atu haruka espesialista sira husi Izraél mai Timor-Leste hodi fahe koñesimentu no esperiénsia,” nia haktuir.
Vilan konsidera edukasaun nu’udár setór importante ida ba kooperasaun bilaterál entre nasaun rua. Nia espera katak iha futuru, Izraél no Timor-Leste bele dezenvolve parseria iha área sira-ne’ebé responde ba nesesidade no prioridade dezenvolvimentu Timor-Leste nian.
Embaixadór Izraél mós subliña katak nia nasaun nakloke atu dezenvolve kooperasaun ho Timor-Leste iha área oioin, inklui defeza.
Aleinde kooperasaun iha setór sira-ne’e, Vilan informa katak iha tempu atuál, timoroan na’in-100 resin mak hala’o servisu iha Izraél.
Nia esplika katak, durante mandatu diplomátiku ne’ebé hala’o daudaun, nia objetivu mós mak atu renova no kontinua programa kooperasaun ne’ebé dezenvolve ona antes, liuliu programa sira-ne’ebé envolve sidadaun Timor-Leste iha Izraél.
Kontestu
Kooperasaun entre Timor-Leste no Izraél iha área agrikultura hahú dezenvolve ona dezde tinan 2015, liuhosi programa Arava International Center for Agricultural Training (AICAT). Programa ne’e fó oportunidade ba joven no estudante timoroan atu aprende teknolojia agrikultura moderna iha Izraél, liuliu iha área ortikultura no pekuária, durante formasaun prátika fulan 11.
To’o Setembru 2024, estudante no joven timoroan na’in-548 mak benefísia ona husi programa ne’e, no balun hahú aplika koñesimentu ne’ebé hetan atu dezenvolve atividade agrikultura iha Timor-Leste.
Klik notísia relevante sira iha kraik hodi lee:
- https://id.tatoli.tl/2024/09/05/139-pelajar-timor-leste-kembali-ikuti-program-aicat-di-Izraél/
- 2. https://pt.tatoli.tl/2021/01/15/map-enviou-ja-mais-de-200-timorenses-para-Izraél-para-uma-formacao-de-agricultura/
- https://pt.tatoli.tl/2022/08/02/estudantes-timorenses-participam-em-formacao-sobre-agricultura-moderna-em-Izraél/
- 4. https://en.tatoli.tl/2025/06/25/15-timorese-students-brought-home-from-Izraél/21/
Jornalista: Osória Marques
Editór: Xisto Freitas da Piedade

