Top

Estudante na’in-142 sei tuir Ezame Nasionál segunda xamada

Koordenadór Gabinete Kurríkulu Unidade Nasionál Ministériu Edukasaun, João Maupelu. Imajen TATOLI/Osória Marques

DILI, 18 Novembru 2026 (TATOLI)—Estudante hamutuk na’in-142 ne’ebé la konsege tuir Ezame Nasionál 2026 iha primeira xamada tanba razaun oioin, sei tuir ezame segunda xamada ne’ebé sei hala’o durante loron rua, hahú aban (19/11/2026), iha munisípiu idaidak. Ba estudante sira iha Dili, ezame ne’e sei hala’o iha Eskola Ensinu Báziku 30 Agostu, Komoro, Dili.

Koordenadór Gabinete Kurríkulu Unidade Nasionál ME, João Maupelu, esplika katak ezame segunda xamada ne’e tuir planu atu hala’o iha Kuarta ohin, maibé prosesu imprime materiál ezame nian atraza tanba Ministériu Edukasaun (ME) iha ekipamentu imprensaun limitada.

Nia hateten katak Sentru Imprensaun iha Komoro daudaun ne’e Universidade Nasionál Timor Lorosa’e (UNTL) mak utiliza atu imprime matéria ezame ba estudante finalista sira ne’ebé hakarak asesu ba universidade. Tanba ne’e, ME uza mákina imprensaun ki’ik iha edifísiu ministériu nian atu asegura konfidensialidade materiál ezame.

“Tanba ne’e, ita uza mákina imprensaun ki’ik iha edifísiu ministériu nian atu asegura konfidensialidade matéria ezame nian,” Maupelu dehan ba jornalista sira, iha nia kna’ar-fatin, Vila Verde, Kuarta ne’e.

Nia esplika katak estudante sira-ne’ebé sei tuir ezame segunda xamada ne’e balun la konsege partisipa iha primeira xamada tanba moras, balun tanba partisipa iha kompetisaun desportiva iha Azerbaijaun, no balun tanba sofre asidente.

“Totál estudante na’in-142 ne’e sei tuir ezame segunda xamada tanba balun moras, balun ba partisipa iha kompetisaun desportiva iha Azerbaijaun, no balun tanba asidente. Estudante hirak-ne’e sei tuir ezame iha sira-nia munisípiu rasik, enkuantu estudante sira iha Dili sei konsentra iha Eskola Ensinu Báziku 30 Agostu, Komoro, Dili,” Maupelu hateten.

Estudante na’in-142 ne’ebé sei tuir ezame segunda xamada ne’e kompostu husi estudante Ensinu Báziku na’in-51, Ensinu Sekundáriu Jerál na’in-89 no Ensinu Sekundáriu Tékniku-Vokasionál na’in- rua (2).

Bazeia ba distribuisaun tuir munisípiu, estudante na’in-ida (1) maihusi Aileu, na’in-ualu (8) husi Baukau, na’in-lima (5) husi Bobonaru, na’in-105 husi Dili, na’in-sanulu (10) husi Lautein, na’in-rua (2) husi Likisá, na’in-neen (6) husi Manufahi, na’in-ida (1) husi Oekusi no na’in-haat (4) husi Vikeke.

Kontestu

Ezame Nasionál 2026 ba estudante finalista iha Timor-Leste hahú iha 19 Outubru no ramata iha 22 Outubru 2026. Ministériu Edukasaun rejista estudante hamutuk na’in-51.188 atu partisipa iha ezame ne’e, inklui estudante hosi Ensinu Báziku, Ensinu Sekundáriu Jerál no Ensinu Sekundáriu Tékniku-Vokasionál.

Antes ne’e, Ministériu Edukasaun mós informa katak estudante sira ne’ebé la konsege tuir ezame iha primeira xamada tanba problema saúde ka razaun espesífika seluk sei hetan oportunidade atu tuir ezame segunda xamada, tuir prosedimentu ne’ebé autoridade edukasaun determina. Iha Munisípiu Vikeke, ezemplu ida, estudante finalista na’in-22 la marka prezensa iha ezame dahuluk no hein oportunidade atu tuir ezame segunda xamada.

Klik notísia relevante sira iha kraik hodi lee:

  1. Ministra Edukasaun husu estudante finalista sira uza máskara iha ámbitu Ezame Nasionál
  2. ME sei publika rezultadu Ezame Nasionál 2026 iha Dezembru
  3. Estudante finalista na’in-22 iha Vikeke la marka prezensa iha Ezame Nasionál 2026
  4. Estudante na’in-sia iha Baukau sei tuir ezame nasionál iha segunda emisaun

Jornalista: Osória Marques

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!