Top

Timor-Leste sei realiza eventu internasionál tolu, inklui Simeira Fraternidade Umana

Prezidente Repúblika, José Ramos-Horta. Imajen TATOLI/Egas Cristóvão.

DILI, 18 Novembru 2026 (TATOLI)-Prezidente Repúblika, José Ramos-Horta, informa katak, Timor-Leste sei orgaziza eventu internasionál boot tolu iha Agostu 2027, inklui Simeira Prémiu Nobel iha área Siénsia, Simeira Fraternidade Umana no Torneiu Xadrez.

Nia esplika katak eventu hirak-ne’e importante tebes ba Timor-Leste, liuliu Simeira Prémiu Nobel iha área Siénsia ne’ebé realiza ona iha Agostu tinan ida-ne’e, ho konvite ba membru na’in-25. Agora, hakarak organizadór sira iha planu atu aumenta númeru partisipante ba na’in-50.

Simeira Fraternidade Umana, ne’ebé sei realiza dahuluk iha Dili, sei envolve líder relijiozu sira husi mundu tomak, inklui Papa Leão no Grande Imame.

Enkuantu, Torneiu Xadrez Mundiál sei envolve partisipante na’in-3.000 no sei hala’o durante semana rua.

“Xadrez mak jogu ida ne’ebé dezenvolve kapasidade intelektuál no importante tebes iha mundu. Amigu ida husi rai-li’ur hakarak loke akademia xadrez ida iha Timor-Leste”, nia dehan.

Grupu ida-ne’e mai ona atu halo levantamentu kona-ba kapasidade alojamentu iha ótel sira. Sira informa katak ótel sira la sufisiente, nune’e sira prontu atu dada ró kruzeiru boot rua mai Timor-Leste.

Xefe Estadu mós informa katak eventu internasionál tolu ne’e hetan apoiu finanseiru hamutuk millaun $25 husi parseiru internasionál. Maski nune’e, seidauk iha informasaun kona-ba data no programa detallu ba eventu idaidak.

Jornalista: Nelson de Sousa

Editora: Maria Auxiliadora 

 

Publisidade

Leave a Reply

Latest Post

error: Content is protected !!