Retallitas balun hahú reativa atendimentu kombustível ba konsumidór sira iha Kapitál Dili

DILI, 18 Novembru 2026 (TATOLI)–Estasaun Abastesimentu Kombustível (pertamina) balun iha Timor-Leste liuliu iha sidade Dili, durante loron rua ikus ne’e hasoru falta kombustível maibé iha Tersa (17/11) lorokraik ne’e sira hahú reativa fali fornesimentu kombustível ba komunidade hanesan baibain.
Bazeia ba monitorizasaun direta husi TATOLI iha estasaun kombustivel (pertamina) balun iha Dili, falta kombustível nune’e sira hapara temporariamente atividade fa’an kombustível tanba sira nia estoke hotu ona. Maibé iha balun mak hahú fali funsiona hafoin simu fornesimentu foun husi distribuidór sira.
Xefe Jestaun Belak Fuels iha Fomento II, Cosme Freitas, informa estasaun kombustível ne’ebé nia jere antes ne’e sira hapara atividade fa’an kombustível durante loron rua tanba estoke kombustível hotu.
Maibé, sira simu fali ona fornesimentu foun ho kuantidade tonelada lima iha Segunda (16/11), nune’e sira kontinua fa’an gasolina normál fali iha loron Tersa (17/11).
“Loos duni, durante loron rua, no ohin loron ami laiha kombustível. Maibé, horisehik ami simu fali fornesimentu tonelada lima, nune’e ohin loron kontinua fa’an gasolina hanesan baibain,” Xefe Jestaun ne’e deklara ba TATOLI iha Fomento II, tersa ne’e.
Nia esplika, bainhira funsionamentu ka atendimentu normál depende tebes ba disponibilidade kombustível husi kompañia fornesedór sira.
“Ami-nia fornesimentu kombustível depende ba fornesedór sira. Se sira iha estoke, ami bele kontinua faan. Maibé, se laiha fornesimentu mak obrigatoriamente ami tenke taka estasaun ne’e ho temporariamente,” nia esplika.
Maibé, tuir nia, garante katak sira sei kontinua fó servisu atendimentu ba komunidade durante tempu ne’ebé kombustível sei iha tanba forneimentu husi kompañia fornesedór sira mós kontinua la’o ho di’ak.
Diretór Ezekutivu Kompañia Esperança Timor Oan, Lda. (ETO), Nilton Gusmão, garante katak kompañia ne’e iha rezerva kombustível sufisiente atu asegura fornesimentu ba kliente hotu durante fulan Novembru, Dezembru, Janeiru no fulan sira tuirmai.
“ETO iha rezerva kombustível ne’ebé sufisiente atu garante fornesimentu ba kliente sira durante fulan tolu no tinan oin mai,” Emprezáriu ne’e deklara.
Nia esplika, estasaun kombustivel (pertamina) balun ne’ebé falta kombustível ne’e tanba sira hetan fornesimentu husi distribuidór seluk ka la’ós husi rede distribuisaun ETO nian.
“Postu abastesimentu seluk ne’ebé falta kombustível tanba sira balun hetan fornesimentu husi distribudór seluk, ne’ebé durante ne’e fornese sira nia nesesidade. Enkuantu retallitas sira-ne’ebé sosa kombustível husi ETO ka sai kliente ETO, kontinua simu fornesimentu hl normál ka laiha problema ida, tanba ami iha rezerva iha fatin armazenamentu nian,” nia esplika.
Nia mós apela ba komunidade atu labele sosa kombustível ho kuantidade boot liu nesesidade, tanba fornesimentu husi ETO nian ba kliente sira sei kontinua disponivel.
“Komunidade bele sosa kombustível ho hakmatek tuir nesesidade loroloron. Obrigadu ba fiar ne’ebé imi fó mai ami,” nia dehan.
Iha biban ne’e, Sekretária kompañia no reprezentante legál iha Pertamina International Timor, S.A. (PITSA). Sarpeher Marthen Ratu, mós garante katak sira-nia rezerva kombustível kontinua iha kondisaun seguru no atividade distribuisaun ba kliente sira kontinua la’o.
“Ami nia stoké seguru no distribuisaun la’o di’ak hela, bele haree iha Pantai Kelapa, karreta-tanke sira hala’o hela atividade fornesimentu kombustível ba kliente,” nia dehan.
Nune’e, deklarasaun ne’e nia objetivu atu esplika kondisaun rezerva no atividade distribuisaun kombustível husi Pertamina International Timor-Leste, ne’ebé antes ne’e iha relatóriu kona-ba falta kombustível iha estasaun balun iha Dili.
Enkuantu bazeia ba rezultadu monitorizasaun husi TATOLI to’o Tersa lokraik, situasaun distribuisaun kombustível iha área balun iha Sidade Dili hahú hatudu ona sinál di’ak fali, estasaun balun ne’ebé antes hapara servisu, agora reativa fali.
Enkuantu SPBU balun seluk informa katak sira planeia atu hahú fali fó atendimentu ba komunidade iha loron Kuarta (18/11), hafoin hetan fornesimentu kombustível husi distribuidór sira.
Jornalista : Alexandra da Costa
Editór : Cancio Ximenes

