Top

TL konsidera WorldSkills Asia loke espasu hodi promove investimentu rekursu umanu

Ministru Agrikultura, Pekuária, Peska no Floresta (MAPPF), Marcos da Cruz.Foto TATOLI/Antonio Daciparu

DILI, 18 Novembru 2026 (TATOLI)—Timor-Leste liuhusi Ministériu Koordenadór ba Asuntu Ekonómika konsidera Asembleia WorldSkills Asia loke espasu hodi promove investimentu iha Timor-Leste liuliu kapasitasaun rekursu umanu iha setór oioin.

Tanba ne’e, tuir reprezentante Ministru Koordenadór Asuntu Ekonómiku, Marcos da Cruz, iha abertura nia sente onra no kontente tebes, iha naran Governu no Povu Repúblika Demokrátika Timor-Leste, atu fó boas-vindas ba imi hotu iha Dílli iha okaziaun Assembleia Jerál WorldSkills Asia ba da-10

Ba delegadu no konvidadu sira-ne’ebé mai husi nasaun sira iha Ázia no rejiaun seluk, Governu Timor-Leste hato’o boas-vindas ho laran tomak ba imi hotu iha Timor-Leste.

“Ha’u-nia apresiasaun no parabéns sinseru ba Komité Organizadór, tanba sira-nia dedikasaun, servisu maka’as no kompromisu iha preparasaun ba Assembleia importante ida-ne’e,”  Reprezentante MKAE, atuál Ministru MAPPF, relata iha Palm Spring otél, ohin.

Ministru ne’e mós hakarak rekoñese kontribuisaun valioza husi WorldSkills Azia, INDIMO, instituisaun nasionál sira, instituisaun formasaun sira, parseiru dezenvolvimentu, péritu sira, setór industriál no setór privadu, ne’ebé liuhusi esforsu hamutuk halo enkontru ida-ne’e bele realiza.

“Ida-ne’e hatudu katak ita iha kompromisu hamutuk atu hametin dezenvolvimentu kapasidade profisionál no kria oportunidade di’ak-liu ba ita-nia povu,” nia dehan.

Ba Timor-Leste, simu Assembleia ida-ne’e nu’udar nasaun organizadór mak onra no responsabilidade ida. Ida-ne’e fó oportunidade ba ita atu aprende husi parseiru rejionál sira, fahe esperiénsia, hametin kooperasaun no harii parseria foun sira ba dezenvolvimentu rekursu umanu no ekonomia ita-nia rai tanba investe iha kapasidade profisionál signifika investe iha ema

“Bainhira ita investe iha kapasidade profisionál, ita investe iha ema no bainhira ita investe iha ema, ita investe iha nasaun nia futuru. Ba Timor-Leste, ita-nia povu, liuliu juventude sira mak ita-nia rikusoin nasionál boot-liu,” nia dehan.

Nia hatutan, infraestrutura, teknolojia, rekursu naturál no investimentu finanseiru importante ba dezenvolvimentu maibé ema-ne’ebé iha koñesimentu no kapasidade maka’as mak bele transforma rekursu hirak-ne’e sai produtividade, inovasaun, negósiu, empregu no kresimentu ekonómiku ne’ebé sustentável.

Tanba ne’e, dezenvolvimentu kapasidade profisionál la’ós de’it asuntu edukasaun ka formasaun. Ida-ne’e mak baze esensiál ba kapitál umanu, empregu, empreendedorizmu, produtividade, investimentu, inovasaun no kompetitividade nasionál.

“Tanba razaun ida-ne’e mak servisu WorldSkills importante tebes, promove ezelénsia iha kapasidade téknika no profisionál, inspira juventude sira, hasa’e padraun profisionál, enkoraja inovasaun no hametin kooperasaun entre instituisaun sira kona-ba kapasidade profisionál, setór industriál no Governu sira,” nia dehan.

Nia enfatiza katak objetivu hirak-ne’e iha relasaun direta ho prioridade dezenvolvimentu Timor-Leste nian.

Prezidente FundasaunWorldSkills Asia, Mubarak Al Shamsi, hateten sira-nia servisu hodi hametin unidade no halo ema hotu hamutuk. Tanba ne’e, nia mós hato’o agradesimentu ba delegasaun hotu-hotu ne’ebé halo viajen mai Timor-Leste no kontribui ba ita-nia misaun komún.

“Asambleia Jerál ida-ne’e fó oportunidade ba ita atu liga misaun ne’e ho desizaun prátika, hametin membru sira, prepara kompetisaun sira iha futuru, aprende ba malu no asegura katak sistema governasaun ita-nia suporta objetivu ne’ebé ita hakarak atinje,” nia dehan.

Membru sira lori esperiénsia, prioridade no rekursu ne’ebé diferensa. Diversidade ida-ne’e mak sai ita-nia forsa. Liuhusi diálogu ho respeitu no kooperasaun ne’ebé signifikativu, bele ajuda malu atu avansa ba oin, la presiza hein katak nasaun hotu-hotu tenke tuir dalan hanesan.

“Enkuantu ita konsidera oportunidade sira husi Inteligénsia Artifisiál (IA), ita-nia ambisaun tenke liuhusi adaptasaun ba teknolojia foun. Ita tenke prepara ema atu uza teknolojia hirak-ne’e ho kapasidade téknika, julgamentu ne’ebé loos no responsabilidade,” nia hateten.

Teknolojia tenke haforsa kapasidade umana, no oportunidade sira tenke loke ba estudante hotu-hotu, la haree ba sira-nia orijen ka background.

“Durante loron tolu tuirmai, ha’u enkoraja imi hotu atu ko’alia ho nakloke no fó atensaun ba buat ne’ebé ita bele realiza hamutuk,” nia hateten.

Husu ba hotu-hotu atu sai husi Delhi ho komprensaun ne’ebé klaru liután, parseria ne’ebé forte liután no kompromisu foun atu kontinua serbí povu sira-ne’ebé ita reprezenta.

“Ho espíritu ida-ne’e, ha’u kontente atu deklara abertura ofisiál ba WorldSkills Asia 10.ª Asambleia Jerál, Delhi 2026,” nia dehan.

Jornalista : Alexandra da Costa

Editór        : Cancio Ximenes

Publisidade

Leave a Reply

Latest Post

error: Content is protected !!