Top

Komunidade kontente Governu lansa projetu reabilitasaun estrada iha Likisá

projetu reabilitasaun estrada urbana iha Likisa

LIKISÁ, 19 Novembru 2026 (TATOLI)—Reprezentante komunidade iha Aldeia Raigua, Suku Dato, Munisípiu Likisá, Vicente da Cruz, sente kontente ho esforsu Governu ne’ebé kria ona dezenvolvimentu liuhusi lansamentu fatuk dahuluk ba projetu reabilitasaun estrada urbana iha sira-nia rai.

“Ami sente kontente tebes tanba Governu bele haree no rona ami-nia difikuldade ne’ebé durante ne’e ami hasoru liuliu kondisaun estrada ne’ebé ladi’ak difikulta ami-nia movimentasaun,” reperzentante komunidade ne’e deklara ba jornalista sira iha Postu Villa Maumeta, Likisá, ohin.

Tuir nia, kondisaun estrada ne’e aat dezde tempu Indonézia kedas mak to’o ohin loron, entaun dalaruma tempu udan bee la sulin tuir drainajen ne’ebé iha hodi fó impaktu ba sira-nia kintal no tempu bailoro kondisaun estrada maran hamosu rai-rahun maka’as hodi fó impaktu ba saúde públiku.

“Tempu udan ami sofre loos tanba drainajen mós laiha entaun bee la sulin tuir nia dalan entaun estraga fali ami-nia toos sira no balun sulin ba uma laran. Satán iha tempu bailoro provoka rai-rahun suar halo moras,” nia dehan.

Maibé, nia hateten, ba oin sira sei la sente tan ona problema hanesan ne’e tanba ohin loron IX-Governu lansa ona projetu reabilitasaun estrada urbana iha sira-nia munisípiu hodi fasilita sira-nia movimentasaun ho di’ak liután no bele atrai investor sira hodi investe iha área potensiál sira-ne’ebé mak munisípiu Líkisa iha.

“Tanba ne’e ami sei koopera ho kompañia durante prosesu implementasaun nian, tanba infraestrutura mak sai fatór importante ba komunidade. Maibé ami mós husu ba Governu atu kria lampu jalan ba munisípiu Likisá,” nia rekomenda.

Aleinde ne’e, reperzentante komunidade aldeia Maubara Villa, Luzia Soares, hato’o agradesimentu ba Governu bele rezolve ona problema ne’ebé sira enfrenta hanesan asesibilidade ba estrada nian.

“Durante ne’e ami haree Governu lansa fatuk dahuluk iha fatin-fatin, maibé ohin loron ami mós hetan oportunidade ba buat ne’ebé durante ne’e ami hein hela. Loos duni, esperansa la bosok,” abitante ne’e informa.

Maibé, nia husu nafatin ba Governu atu mellora nafatin dezenvolvimentu infraestrutura hanesan bee-moos, tanba durante ne’e sira mós falta asesu ba bee-moos, tanba SAS iha munisípiu Likisá la funsiona.

Jornalista : Alexandra Costa

Editór       : Cancio Ximenes

Publisidade

Leave a Reply

Latest Post

error: Content is protected !!