Top

STAE Bobonaru halo REABD móvel bá suku sira hodi atualiza kartaun biométriku

Progresu "Sistema Informasaun Resensiamentu Elitoral (SIRE) Biométriku, iha salaun STAE Díli, tersa (15/10/2024). Imajen Tatoli/Francisco Sony

BOBONARU, 20 Novembru 2026 (TATOLI) – Sekretariadu Tékniku Administrasaun Eleitorál (STAE) Munisípiu Bobonaru implementa programa atendimentu móvel iha suku sira ne’ebé distánsia dook husi sentru atendimentu iha postu administrativu, atu fasilita sidadaun sira atualiza dadus eleitorál no halo resenseamentu eleitorál ho baze biométriku.

Diretór Komisaun Nasionál Eleisaun (CNE) Munisípiu Bobonaru, Juvito António Ramos, hatete katak atendimentu móvel ne’e hanesan esforsu ida atu hakbesik servisu ba komunidade, inklui sidadaun ho defisiénsia no ema idozu sira, nune’e sira bele asesu fásil liu ba prosesu atualizasaun dadus eleitorál.

Tuir dadus ne’ebé disponivel, Bobonaru iha eleitór hamutuk 78.000-resin, maibé durante prosesu Resenseamentu Eleitorál no Atualizasaun Dadus Biométriku (REABD), eleitór ne’ebé atualiza ona kartaun eleitorál ba sistema biométriku foin atinje 37%.

Notísia relevante: Autoridade Bobonaru husu lideransa lokál mobiliza eleitór partisipa REABD Biométriku

“Porsentu eleitór ne’ebé atualiza ona kartaun eleitorál biométriku seidauk aas. Tanba ne’e, STAE halo esforsu atu mobiliza komunidade no hakbesik atendimentu bá suku sira, liuliu suku sira ne’ebé distánsia dook husi fatin atendimentu iha postu administrativu”, Diretór CNE hateten iha Rádio Komunidade Maliana, sesta-feira ne’e.

Juvito esplika katak dezafiu prinsipál ne’ebé STAE hasoru mak to’o agora eleitór 63% seidauk halo atualizasaun dadus tanba falta dokumentu identidade, hanesan sertidaun moris RDTL, billete identidade no pasaporte, ne’ebé sai rekizitu importante atu fasilita prosesu resenseamentu eleitorál no atualizasaun dadus.

Aleinde ne’e, distánsia husi suku remotu ba sentru atendimentu iha postu administrativu no limitasaun osan atu selu transporte mós sai obstákulu ba eleitór balun atu asesu servisu.
Dezafiu seluk mak akizisaun materiál ne’ebé uza ba prosesu REABD ne’ebé mai tarde, ne’ebé aumenta presaun ba STAE tanba tuir lei, prosesu resensiamentu eleitorál sei taka iha 22 Janeiru 2027.

Atu responde ba dezafiu hirak ne’e, STAE halo ona enkontru ho Autoridade Munisipál Bobonaru, administradór postu, xefe suku no reprezentante partidu polítiku sira, atu hametin divulgasaun no mobilizasaun ba komunidade.

STAE mós aproveita programa formasaun Feto Potensiál iha Postu Administrativu Atabae, Balibó no Kailaku atu fó informasaun ba feto potensiál, líder komunitáriu no partidu polítiku sira kona-ba importánsia atualizasaun dadus eleitorál biométriku.

“Agora, ita iha limitasaun tempu la halimar tanba tinan oin 22 janeiru 2027 prosesu REABD STAE sei taka tuir lei”, nia dehan.

Juvito subliña katak esforsu ne’e importante atu asegura sidadaun hotu, liuliu sira ne’ebé hela iha área remota, ho defisiénsia no idozu sira, bele hetan oportunidade hanesan atu partisipa iha prosesu resensiamentu eleitorál.

Nia mós informa katak, tuir informasaun ne’ebé CNE hetan, Governu iha intensaun atu uza kartaun eleitorál biométriku ba Eleisaun Prezidensiál, maski to’o agora seidauk iha dekretu-lei ne’ebé determina obrigatoriedade uza kartaun biométriku iha prosesu votasaun.

Tanba ne’e, nia husu eleitór sira ne’ebé seidauk atualiza kartaun eleitorál atu aproveita oportunidade atendimentu iha sentru no servisu móvel ne’ebé STAE disponibiliza, nune’e prosesu preparasaun ba eleisaun sira iha futuru bele la’o ho di’ak.

Xefe Suku Male-Ubu, Quintiliano Barros, konsidera atendimentu móvel ne’e bele hasa’e númeru eleitór atualiza dadus ba sistema biometriku. “Programa ne’e di’ak no ajuda tebes komunidade ein jerál, maibé ajuda tebes partikularmente ferik-katuas sira”, nia dehan.

Quintiliano mós rekomenda ba órgaun eleitorál atu implementan tan programa referidu ba segunda faze. “Ami-nia suku hotu tiha ona, tempu badak demais, tanba foin daudaun komunidade barak mak la konsege hasai tanba tempu la to’o”, nia realsa.

Notísia relevante: STAE Bobonaru halo REABD Biométriku ba EhD no idozu 6.110

Jornalista: Sergio da Cruz

Editora: Maria Auxiliadora

 

Publisidade

Leave a Reply

Latest Post

error: Content is protected !!