Kazu raiva pozitivu iha Vikeke sa’e ba 33, asu 32 no karau ida

VIKEKE, 19 Novembru 2026 (TATOLI)—Departamentu Veterináriu Munisípiu Vikeke rejista ona kazu balada pozitivu ba vírus raiva hamutuk 33, ne’ebé kompostu husi asu 32 no karau ida, bazeia ba rezultadu teste laboratóriu ba amostra balada sira-ne’ebé ekipa téknika veterinária foti.
Xefe Departamentu Veterinária Munisípiu Vikeke, Domingos do Carmo Pinto, informa katak kazu pozitivu hirak-ne’e rejista durante fulan-Novembru 2026, depoizde ekipa téknika veterinária halo teste ba amostra balada sira.
“Kona-ba kazu vírus raiva iha Munisípiu Vikeke durante fulan-Novembru ne’e, ami halo teste ba amostra balada sira no rejista ona kazu pozitivu hamutuk 33. Husi númeru ne’e, asu pozitivu hamutuk 32 no karau ida pozitivu, ne’ebé foin lalais ekipa téknika veterinária deteta liuhosi teste,” Domingos do Carmo Pinto dehan ba TATOLI, iha Postu Administrativu Vikeke Vila, Kinta ne’e.
Nia hatutan katak ekipa téknika veterinária foti amostra balada hamutuk 37 atu halo teste. Husi amostra hirak-ne’e, 33 hetan rezultadu pozitivu ba vírus raiva, enkuantu amostra haat seluk hetan rezultadu negativu.
Kona-ba karau ne’ebé hetan rezultadu pozitivu ba vírus raiva, Domingos aviza komunidade atu la konsume karau ne’e nia na’an, liuliu se karau ne’e mate. Nia mós informa katak Ministériu Agrikultura, Peska no Floresta (MAPPF) rekomenda ba komunidade atu la konsume na’an husi karau ne’ebé afetadu ho vírus raiva.
Nia esplika katak, bainhira iha situasaun ne’ebé presiza oho balada, ema ne’ebé halo servisu ne’e tenke uza ekipamentu protesaun, hanesan luvas no ókulu, atu evita risku kontaminasaun. Nia mós aviza katak ema ne’ebé iha kanek labele oho karau ne’ebé suspeitu ka afetadu ho vírus raiva.
“Karau ne’ebé hetan vírus raiva, se mate, ita labele konsume nia na’an. Ministériu Agrikultura, Peska no Floresta mós rekomenda ba komunidade atu la konsume na’an husi karau ne’ebé afetadu ho vírus raiva. Ema ne’ebé halo servisu oho balada tenke proteje an ho ekipamentu protesaun, hanesan luvas no ókulu, atu evita risku kontaminasaun,” Domingos akresenta.
Atu prevene kazu raiva, nia dehan katak tékniku veterinária iha Munisípiu Vikeke kontinua halo vaksinasaun ba balada komunidade nian. Nia asegura katak, to’o agora, ai-moruk no vasina atu kombate vírus raiva iha munisípiu ne’e sei sufisiente.
Aleinde ne’e, nia informa katak servisu veterináriu nasionál responde ona ba nesesidade munisípiu Vikeke, liuhosi distribuisaun ekipamentu frizer ida ba Sentru Klínika Veterinária iha Postu Administrativu Uatulari, atu rai ai-moruk no vasina ne’ebé sei uza ba atendimentu veterináriu.
“Frizer atu rai ai-moruk ne’e servisu veterináriu nasionál haruka ona mai munisípiu, no ami distribui ona ba Uatulari. Iha tempu badak, ekipa sei kontinua halo vasinasaun ba balada komunidade nian, hodi prevene vírus raiva ne’ebé rejista iha Munisípiu Vikeke,” nia hatutan.
Kontestu
Kazu raiva iha Munisípiu Vikeke hahú deteta iha fulan-Agostu 2026, bainhira Departamentu Veterináriu konfirma asu rua pozitivu ba vírus ne’e iha Suku Uma-Ki’ik no Bahalaraua’in. Iha fulan-Setembru, númeru kazu pozitivu aumenta bá 11, no iha loron 29 Setembru 2026, aumenta tan bá 22.
Iha loron 07 Outubru 2026, autoridade lokál informa kazu pozitivu raiva iha munisípiu ne’e sa’e ona ba 24. Aumentu kazu hirak-ne’e hatudu katak prevensaun, vasinasaun ba balada no vijilánsia veterinária kontinua sai prioridade atu kontrola propagasaun vírus raiva iha komunidade.
Klik notísia relevante sira iha kraik hodi lee:
- Kazu Raiva iha Vikeke sa’e ona bá 24, Autoridade Ahik husu Diresaun Veterinária halo intervensaun
- Veterináriu Vikeke rejista kazu asu pozitivu raiva sa’e bá 22
- Veterináriu Vikeke rejista asu lima pozitivu raiva
- Rabies – Timor-Leste: Disease Outbreak News
- Timor-Leste strengthens dog bite surveillance to fight rabies
Jornalista: Vitorino Lopes da Costa
Editór: Xisto Freitas da Piedade

