Xanana Gusmão triste ho kazu JRC oho Palomita Gusmão iha Tasi-Tolu

LIKISÁ, 19 Novembru 2026 (TATOLI)—Primeiru-Ministru, Kay Rala Xanana Gusmão, hateten nia sente triste rona akontesimentu kazu omesídiu ne’ebé komete husi joven menoridade (arguidu) ho inisiál JRC ne’ebé oho vítima Palomita Gusmão Guterres, iha Tasi-Tolu loron 18 fulan-Novembru 2026.
“Ha’u sei iha Manila ne’ebá, ha’u triste tebes tanba joven mane ida oho feto ida, sona nia kabun de’it dala-30 ho tudik,” Primeiru-Ministru Xanana Gusmão deklara iha ámbitu lansamentu fatuk dahuluk ba projetu reabilitasaun estrada urbana iha Líkisa, ohin.
Xefe Governu husu boot iha Líkisa imi respeita malu ba, nia lakohi rona arte marsiál iha ne’e hodi hafahe imi-nia relasaun, dalaruma fahe mós relasaun uma laran nian (família).
“Tuir arte marsiál ba iha nasaun viziñu Indonézia jura bandeira Merah Putih, mai ita oho malu fali, mai ita fahe malu fali iha ita-nia uma laran. Tanba ne’e, favór ida joven sira buka servisu, karik servisu seidauk iha buka halo investimentu,” Xanana hateten.
Nia dehan, joven sira tenke buka servisu hodi kria empregu ba sira-nia an labele halimar mak mídia sosiál no agora joven sira barak mak lakohi atu kolen uitoan no kosar uitoan ne’e sira lakohi ona.
“Kapás tebe-tebes, sira lakohi tanba baruk-teen, tauk liman foer, ne’eduni husu ita atu koopera malu buka servisu. Labele husu ba Governu maibé husu ba ó-nia an saida mak ó atu fó kontribuisaun ba rai ida-ne’e,” Xanana dehan.
Xefe Governu ne’e hatutan, agora Governu esforsu kria Banku Nasionál Dezenvolvimentu hodi loke espasu ba joven produtivu sira-ne’ebé hakarak investe sira-nia abilidade iha negósiu, Governu sempre apoiu nafatin hodo diversifika ekonomia iha rai-laran.
Jornalista : Alexandra da Costa
Editór : Cancio Ximenes

