Negosiante iha merkadu Maliana fa’an sasán to’o okupa espasu públiku

BOBONARU, 20 Novembru 2026 (TATOLI)-Komunidade no motorista sira preokupa ho negosiante sira ne’ebé durante ne’e halo atividade fa’an sasán no hahán iha espasu públiku iha merkadu Maliana, munisípiu Bobonaru.
Komunidade Pedro Lopes lamenta ho aktu vendedór sira-nian, tanba fó impaktu no risku ba serguransa ema la’o ain.
“Sira tau fali sasán, meza iha trotoár leten, ami la’o fali iha estrada laran, depois dadeer-dadeer ne’e ema mai sosa nas bungkus ne’e barak loos. Ita bá-mai liu fali estrada laran, karreta ho motór bele xoke ita, ha’u lahatene fatin ne’e halo atu ema la’o nian ka ba sira atu fa’an sasán”, nia informa ba Tatoli, ohin.
Biban ne’e, otorista Nelson Pereira rekomenda ba Autoridade Munisípiu Bobonaru liu Diresaun Servisu Munisipál Jestaun Merkadu atu kontrola ktividade referida hodi prevene engarrafamentu.
“Fatin ida agora besik kampu ninin ne’e, sira fa’an etu iha trotoár leten, depois ami para karreta iha sorin. Agora, ema la’o fali iha parkiran ami para ne’e, depois ami mós atu sai dalaruma susar, tanba motór ho karreta para mai sosa etu ne’e para hotu iha estrada laran. Se bele Governu haree took ida-ne’e”, nia dehan.
Notísia relevante: Governu sei aplika koima ba vendedór faan sasán iha espasu públiku
Ba kestaun ne’e, Diretór Servisu Munisipál Jestaun Merkadu, Autoridade Munisípiu Bobonaru, Paulo dos Santos, esklarese kada-loron jestór merkadu sempre avizu hodi bandu negosiante sira okupa espasu públiku hodi halo atividade negósiu, maibé nafatin laiha konxiénsia hodi kontinua halo atividade.
“Ha’u orienta jestór sira kontinua bá terrenu atu fó hatene, agora sira muda ona ba oin sei kontinua hanesan ne’e, tanba trotoar ne’e fatin para ema la’o bá-mai”, nia dehan.
Paulo reforsa katak ekipa jestaun merkadu seidauk foti asaun rigoroza kontra okupante sira tanba tinan oin merkadu referida muda ona bá Mu-Mali.
“Iha Mau-Mali ne’e di’ak ona tanba iha muru laran, idaidak fa’an tuir ninia fatin. Uma agora kompañia kontrui ona, muru iha tiha ona”, nia realsa.
Funsaun prinsipál husi trotoár mak fó dalan ne’ebé seguru no hakmatek ba ema la’o ain hodi la’o iha estrada ninin, hodi haketak husi movimentu veíkulu sira.
Notísia relevante: EDTL Oekusi notifika ona loja Ren Zhi ne’ebé okupa ai-riin elétrika iha espasu públiku
Jornalista: Sergio da Cruz
Editora: Maria Auxiliadora

