OEKUSI, 11 Maiu 2026 (TATOLI) –Departementu Eletrisidade de Timor-Leste (EDTL) Rejiaun Administrativa Espesiál Oekusi Ambeno (RAEOA), atribui ona karta notifikasaun ba loja Xineza Ren Zhi Unipesoál Lda iha bairru Masin suku Costa sub-rejiaun Pante Makasar tanba hametin no okupa ai-riin elétrika iha espasu públiku.
Notísia relevante:Loja Ren Zhi iha Oekusi okupa ai-riin elétrika iha espasu públiku
Xefe Departamentu EDTL Oekusi, Antão Cabal, afirma desizaun ne’e kumpre orientasaun husi Sekretáriu Estadu Asuntu Toponímia Organizasaun Urbana (SEATOU), tanba loja-na’in la kumpre sasán Estadu nian ne’ebé monta iha espasu públiku.
“Momentu ne’ebá, halo konstrusaun uma ne’e mós loja-na’in la informa mai EDTL, ita hetan bainhira uma ne’e halo ona, entaun ida-ne’e mós difikuldade ba ita, maibé liuhusi serbisu SEATOU orienta, ami mós husi EDTL fó ona notifikasaun ho intervensaun atu asegura liña ne’e, atu labele fó ameasa ba vida,” nia hateten ba Ajénsia Tatoli,I.P iha Oekusi, ohin.
Nia informa, tuir EDTL nia observasaun no identifikasaun, la’ós loja ne’e de’it mak okupa postu elétrika, maibé kuaze loja haat ka lima mak okupa área Pante Makasar.
“Ne’e prejudika ita-nia asaun atendimentu enerjia elétrika liuhusi liña distribuisaun, ne’ebé ita rekolla ona dadus balun iha ne’e, bainhira SEATOU mai, ita sei aprezenta atu halo intervensaun direita, tanba notifika ona maibé loja na’in-sira seidauk kumpre no koopera ho EDTL, atu bele buka solusaun,” nia hateten.
Notísia relevante:Okupa espasu públiku, SEATOU sobu barraka 35 iha Oekusi
Jornalista Ajénsia Tatoli,I.P tenta konfirma asuntu ne’e ho loja-na’in Ren Zhi Unipeso’al Lda, maibé rejeita atu fó informasaun.
Maibé rekorde fali katak, antes ne’e. Sekretáriu Estadu Asuntu Toponímia Organizasaun Urbana (SEATOU), Germano Santa Brites, observa lamenta tebtebes no rekomenda ba Diresaun Rejionál Serbisu Obra Públika atu identifika estatutu rai ho nia dezeñu konstrusaun uma no kontinua notifika kedas loja-na’in atu kumpre.
“Kuandu la kumpre, ha’u mai fali informa mai ha’u, tanba ne’e kontra ona, sasán Estadu nian labele okupa, ne’e mós fó ameasa ba ema nia vida liliu viziñu no traballadór sira,” Sekretáriu Estadu Asuntu Toponímia Organizasaun Urbana (SEATOU), Germano Santa Brites, foin lalais ne’e.
Notísia relevante:SEATOU kontinua sosializa dekretu-lei ijiene no orden públika iha Oekusi
Jornalista: Abílio Elo Nini
Editór: Rafael Ximenes de A. Belo
