OEKUSI, 26 Marsu 2025 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites, kuarta ne’e, hala’o sosializasaun no avaliasaun ba implementasaun dekretu-lei númeru 3/2024, loron 17 fulan-Janeiru, primeiru alterasaun husi dekretu-lei númeru 33/2008, loron 27 fulan-Agostu kona-ba ijiene no ordén públika iha Rejiaun Administrativa Espesiál Oekusi Ambeno (RAEOA).
“Sensibilizasaun ne’e atu kontinua mai observa nafatin servisu iha RAEOA nian ba implementasaun liuliu ba dekretu-lei ne’e, maibé normálmente ita observa sidade Oekusi la’o normál hela no hatudu progresu di’ak uitoan, ha’u hanoin ita tenke haka’as-an atubele sosializa ba povu bele hatene no komprende, nune’e iha futuru halo buat ruma karik bele hakru’uk ba lei sira-ne’e hotu,” Governante ne’e hateten iha otél Ambeno.
Notísia relevante:SEATOU sensibiliza dekretu-lei ijiene no orden públika iha Oé-Cusse
Dektru-lei ijiene no ordén públika ne’e bandu ba buat barak hanesan animál labele la’o livre, sidade tenke ne’e moos, baleta sira tenke moos no bandu sidadaun hotu okupa espasu públiku.
“Lei ne’e bandu ba buat hotu liuliu espasu públiku iha tasi ninin distánsia metru-50, mota ninin metru-25, estrada sira minimu metru-lima no masimu metru-10″, naia afirma.
Iha biban ne’e, Sekretáriu Rejionál ba Asuntu Administrasaun, Andre La’o, hato’o agradesimentu ba Governu Sentrál, tanba bele halo sensibilizasaun daruak ba autoridade lokál sira iha RAEOA.
“Lei ne’e hala’o sensibiliza ona iha 2023, husi ne’ebá to’o ohin tuir observasaun SEATOU katak hatudu progresu di’ak, tan ne’e fiar sensibilizasaun daruak ne’e bele haforsa liután, liña koordenasaun entre RAEOA ho Governu Sentrál, tanba durante ne’e ita mós hala’o ona hanesan dekretu-lei kódigu estrada aplika iha área urbana, maibé agradese ba SEATOU, mai sosializa tán lei ne’e ba xefe suku sira atu ita hamutuk kuida ita-nia ambiente liuliu espasu públiku iha vila-laran,” nia katak.
Entretantu partisipa iha sensibilizasaun ne’e, mai husi Konsellu Suku hamutuk suku 18, jestór sub-rejiaun haat, membru Autoridade inklui diretór no Xefe Departementu sosiedade sivíl, igreja no akademiku sira.
Tuir observasaun, iha ámbitu sensibilizasaun dekretu-lei ijiene no ordén públika promove mós diskusaun aberta durante oras haat nia-laran.
Notísia relevante:SEATOU partilla matadalan atu organiza área urbana iha Oé-Cusse
24 Abríl, SEATOU husu negosiante iha merkadu Numbei-Oekusi hamamuk fatin
Jornalista: Abílio Elo Nini
Editór: Florencio Miranda Ximenes
