Top

Komunidade Suku Taiboko no Usi-Taku hahú enfrenta menus ai-han no bee-moos

Xefe Suku Taiboko. Imajen TATOLI/Natalino Costa

OEKUSI, 17 Novembru 2026 (TATOLI)—Mateus Nas hanesan Suku Taiboko, Sub-Rejiaun Pante Makasar, Rejiaun Administiva Espesiál Oekusi Ambeno (RAEOA) hateten, komunidade lokál daudaun ne’e enfrenta menus ai-han no bee-moos.

“Kona-ba El-Niño iha ha’u-nia Suku Taiboko, iha aldeia haat hanesan Hauboni, Maquelab, Nenum no Ulas. Iha Aldeia Ulas iha bee-matan rua mak durante ne’e fó apoiu ba komunidade maibé bee-matan boot rua ne’e mós bee menus ona la hanesan tinan hirak liubá tanba afeta husi bailoron naruk,” Xefe Suku Taiboko informa ba Ajénsia TATOLI, Tersa ne’e.

Notísia relevante : Komunidade Fatulesu husu APC kontinua apoia bee-moos durante bailoron

Nia dehan, produsaun ai-han iha suku ne’e mós la hanesan baibain, hahú menus tanba mudansa klimátika.

“Komunidade iha ne’e produsaun mak haree, batar no aifarina, kompara tinan kotuk produsaun tinan ida-ne’e tuun maka’as, hanesan tinan kotuk kada família agrikultór hare ka batar sira prodús barak maibé tinan ne’e tuun duni,” nia akresenta.

Iha sorin seluk, Xefe Suku Usi-Taku, Hilário Babo, hateten, komunidade hahú menus bee-moos.

“Iha ne’e bee iha tiha rai okos, komunidade hela iha foho leten, entaun bee tenke dada, maibé ha’u haree bee iha ne’e hahu menús tanba ha’u husu ba komunidade, favór prezerva bee, labele estraga tanba ita mós hahú tama ba bailoron naruk,” nia tenik.

Xefe Suku hatutan, produsaun hare, batar no seluk tan mós hahú menus.

“Ha’u ladún hatene produsaun hare mas ba batar uluk komunidade iha ne’e prodús barak, agora tonelada tolu mós la to’o tanba impaktu husi El-Niño,” nia katak.

Nune’e, nia husu ba komunidade Usi-Taku atu prezerva bee no ai-han atu nune’e bele sai reziliente ba bailoron naruk.

Jornalista     : Natalino Costa

Editora          : Julia Chatarina

Publisidade

Leave a Reply

Latest Post

error: Content is protected !!