Top

Governu fó apoia ai-han no tratamentu saúde ba komunidade iha Suku Usi-Taku Oekusi

Vise-Ministra Solidaridade Sosiál no Inkluzaun, Céu Brites fahe ai-han ba komunidade iha iha Aldeia Fatunababo, Tersa (17/11/2026). Imajen TATOLI/Natalino Costa

OEKUSI, 17 Novembru 2026 (TATOLI)–Governu liuhusi Vise-Ministra Solidaridade Sosiál no Inkluzaun, Ceú Brites hamutuk ho nia ekipa, Tersa ne’e, fó apoia ai-han bázika inklui fó asisténsia médika gratuita ba komunidade iha Aldeia Fatunababo, Suku Usi-Taku, Postu Administrativu Nítibe.

Xefe Suku Usi-Taku, Hilário Babo, apresia ho Governu nia inisiativa ne’ebé bele fó apoia ai-han ba komunidade ne’ebé hela iha área izoladu.

“Agora sira mai apoia ai-han ho tratamentu ba ha’u-nia komunidade ne’ebé mak ho defisiénsia matan, moras fuan, haree la moos, ho ida-ne’e sira bele hetan ókulu hodi taka,” Hilário Babo hato’o ba Ajénsia TATOLI hafoin akompaña Vise-Ministra Solidaridade Sosiál no Inkluzaun, Céu Brites fahe ai-han ba komunidade iha Aldeia Fatunababo.

Nia konsidera, Ministériu Solidaridade Sosiál no Inkluzaun nia programa di’ak tebes tanba bele hakbesik-an ba komunidade hodi haree realidade moris iha área remotas.

“Sira bele mai haree direta nomós povu mós bele sente. Durante ne’e sira haree de’it liuhusi mídia mas ohin bele to’o komunidade nia oin,” nia akresenta.

Administradór Postu Administrativu Nítibe, Agustinho Afulit, hateten, hafoin Timor-Leste ukun-an durante tinan-24 nia laran, Governu hamutuk ho Autoridade Suku no Postu hahú dezenvolve no dudu neneik estrada sira iha fatin izoladu ne’e liuhusi Programa Nasionál Dezenvolvimentu Suku (PNDS).

“Ami agradese tebes ba ita-nia kolaborasaun no serbisu hamutuk mak ohin ita realiza atividade ida-ne’e. Ita-nia komunidade presiza ita-nia prezensa hanesan servidór Estadu, servidór povu, no matan ba povu. Ida-ne’e ami sente kontente tanba ita bele hasoru malu,” nia tenik.

Notísia relevante : MSSI apoia ai-han bázika ba uma-kain 530 iha Suku Taiboko Oekusi

Suku Usi-Taku kompostu husi Aldeia haat hanesan Kuantua, Fatunababo, Nitibe, no Oamna, ho totál populasaun 3.216 kompostu husi mane 1.658 no feto 1.558, husi uma-kain 771.

Uma-kain 346 sai benefisiáriu ba programa apoia ai-han, enkuantu programa Bolsa da Mãe ho benefisiáriu 120, no ema ho defisiensia hamutuk 24 kompostu husi mane sia no feto na’in-15 mak sai benefisiáriu ba programa MSSI.

Iha biban hanesan, Abitante lokál, Agostinho Colo agradese ba Governu tanba ba dahuluk realiza atividade ne’e iha sira-nia suku.

“Ha’u kontente tanba ita-boot bele mai to’o ami-nia fatin. Ita mak membru Governu dahuluk ne’ebé vizita ami, desde uluk Governu sira seidauk iha ida mak vizita ami ne’ebé izoladu. Tanba ne’e, ha’u kontente ohin ita mai direta hodi fó apoiu oituan ba ami,” nia hato’o.

Iha fatin hanesan, Reprezente Prezidente Administrativu Rejiaun Administrativa Oekusi Ambeno (RAEOA), Merita Marques Lafo, husu ba komunidade atu hakbesik hodi halo konsulta matan no simu ókulu inklui halo tratamentu ba moras sira seluk.

Nune’e mós, Vise-Prezidente Komisaun F ne’ebé Trata Asuntu Saúde, Igualdade Jéneru, Veteranu no Solidaridade Sosiál, Deputadu Luís Caldeira, hateten, vizita ne’e hodi hakbesik-an ba povu.

“Governu tenke habesik-an duni ba ita-boot sira, tenke marka prezensa ba ita-boot sira-nia le’et atu nune’e iha nafatin konfiansa ba Governu no Governu mós iha nafatin obrigasaun atu tau-matan ba ita-boot sira,” nia katak.

Programa apoai ai-han no konsulta jerál ba abitante iha Usi-Taku ne’e nu’udar programa MSSI ne’ebé identifika fatin iha área rurál tebes no izoladu.

“Apoiu ida-ne’e la’ós tanba kominidade Usi-Taku laiha kbiit maibé Governu nia prezensa iha ne’e hodi sente no tau-matan ba ita-boot sira, mesmu ida-ne’e iha tempu badak nia laran,” nia tenik.

Vise-Ministra Solidaridade Sosiál no Inkluzaun, Céu Brites, hateten, vizita ne’e tuir IX Governu nia prioridade ne’ebé define ona iha servisu integradu.

” Ohin imi haree ita-nia doutór no doutora espesialista sira ba matan, ba fuan inklui sira husi Futuru Naroman ne’ebé apoia atividade hodi oferese ókulu matan nia ba ita-boot sira, ita agradese ba sira tamba sira to’o mai fatin ne’e hodi fó tratamentu,” nia katak.

Governante ne’e enkoraja Autoridade lokál atu rejista populasaun ne’ebé mak seidauk iha dokumentu komprovativu hanesan sertidaun moris ba labarik sira, nune’e Xefe Suku bele arola hela no enkamiña ba parte relevante atu rezolve.

“Karik atu husu apoiu ba Governu sira bele hetan asisténsia husi MSSI se sira iha dokumentu sira bele asesu ba apoiu ne’ebé Governu fó,” Vise-Ministra hato’o.

Governante ne’e husi ba komunidade atu bainhira iha oan ne’ebé mak ho kondisaun defisiénsia fízika ka mentál, atu habesik ba Autoridade lokál atu nune’e bele rejista hodi Governu bele tau-matan.

Tuir Jornalista Ajénsia TATOLI nia observasaun iha terrenu, nota katak Vise-Ministra hamutuk ho ekipa médika halo identifikasaun ba sidadaun tolu ho kondisaun defisiénsia fízika hodi fó rekomendasaun halo tratamentu iha Sentru Reabilitsaun iha Bekora.

Jornalista     : Natalino Costa

Editora          : Julia Chatarina

 

Publisidade

Leave a Reply

Latest Post

error: Content is protected !!