MSSI apoia ai-han bázika ba uma-kain 530 iha Suku Taiboko Oekusi

OEKUSI, 16 Novembru 2026 (TATOLI)–Governu liuhusi Ministériu Solidaridade Sosiál no Inkluzaun (MSSI), Segunda ne’e, apoia ai-han bázika hanesan foos, mina no ai-han seluk tan ba uma-kain 530 husi Aldeia Ulas, Suku Taiboko, Sub-Rejiaun Pante Makasar, Rejiaun Administiva Espesiál Oekusi Ambeno (RAEOA).
Inisia tiva ne’e atu fó asisténsia sosiál no umanitária ba família vulnerável inklui ema ho defisiénsia sira.
Xefe Suku Taiboko, Mateus Nas, agradese ba Governu nia inisiativa liuhusi Vise-Ministra Solidaridade Sosiál no Inkluzaun, Céu Brites ne’ebé bele tuun iha terrenu fahe asisténsia no rona abitante nia preokupasaun.
“Ida-ne’e Governu nia serbisu, imi tenke mai haree komunidade nia presiza, povu hein hela imi, tanba ne’e, ha’u husu ba Sua Eselénsia atu tau-matan ba povu iha suku ne’e. Ohin ita tau-matan ba Aldeia Ulas, espera aban bainrua bele tau-matan mós ba aldeia sira seluk Suku Taiboko,” Mateus Nas hateten bainhira akompaña Vise-Ministra Céu Brites fahe sasán iha Aldeia Ulas.
Notísia relevante : Autoridade Lakluta apresia MSSI nia apoiu ai-han báziku ba família vulnerável na’in-300
Suku Taiboko Sub-Rejiaun Pante Makasar, kompostu husi aldeia haat hanesan Hauboni, Maquelab, Nenum no Ulas, ho abitante hamutuk 5.124.
Iha fatin hanesan, Reprezentante Prezidente Autoridade RAEOA, Merita Marques Lafo, apresia ba Governu nia inisiativa, ne’ebé iha parte dadeer, médiku liuhusi koordenasaun MSSI halo tratamentu saúde ba abitante sira iha Aldeia Ulas molok fahe sasán.
“Deskulpa ba mudansa oráriu ne’ebé mak iha, maibé ho serbisu koordenasaun ne’ebé RAEOA iha ohin ita fó tratamentu saúde matan ba komunidade, Doutór sira mak halo check komunidade nia matan pois fahe ókulu no ohin iha ne’e fó apoia mós ai-han. Hau hanoin atividade ne’e importante ba futuru kontinua koordenasaun ba malu ita bele fó apoiu ba komunidade vulnerável iha suku to’o área remota,” nia akresenta.
Nune’e mós, Vise Prezidente Komisaun F, Luís Ximenes Caldeira, hateten, Parlamentu Nasionál nia serbisu mak halo lei, aprova lei no Orsamentu Jerál Estadu halo desizaun sira inklui fiskaliza Governu nia atividade.
“Atividade ida-ne’e ami sempre krítika atu Governu tenke tun duni, hanesan ohin lorokraik ida-ne’e iha ita-boot sira-nia oin,” nia katak.
Deputadu ne’e dehan, bainhira Governu la halo nia funsaun ho di’ak, Parlamentu Nasionál nu’udar órgaun fiskalizadór sei halo krítika.
Nune’e mós, Vise-Ministra Solidaridade Sosiál no Inkluzaun, Céu Brites, hateten, Governu mantein kompromisu atu kontinua tau-matan ba komunidade vulnerável sira.
“Atividade ohin ne’e fó apoiu ai-han no tratamentu saúde jerál ba komunidade, aban sira husi Naroman sei fó konsulta matan ba komunidade no sei fahe ókulu,” nia informa.
Governante ne’e dehan, MSSI la’ós de’it fahe ai-han ba komunidade ne’ebé presiza maibé kontinua fó apoiu ba atividade Bolsa da Mãe Kondisionál inklui ema ho nesesidade espesiál sira.
Nia husu ba Xefe Suku Taiboko atu kontrola populasaun lokál, karik abitante ne’ebé mak presiza hetan apoiu husi Governu, liliu ema ho difisiénsia, idozu, labarik inklui ema ho defisiénsia sira tenke koordena ho Diretór MSSI iha Munisípiu ka RAEOA hodi bele fó apoia lalais.
Jornalista : Natalino Costa
Editora : Julia Chatarina

