Autoridade Lakluta apresia MSSI nia apoiu ai-han báziku ba família vulnerável na’in-300

VIKEKE, 16 Novembru 2026 (TATOLI)—Distribuisaun ai-han báziku ba família vulnerável na’in-300, inklui ema ho defisiénsia no idozu, iha Suku Uma-Tolu no Suku Dilór, Postu Administrativu Lakluta, Munisípiu Vikeke, hetan apresiasaun husi autoridade lokál tanba konsidera katak apoiu ne’e ajuda hamenus família sira-nia nesesidade loroloron.
Xefe Suku Uma-Tolu, Eduardo Soares, hateten katak Ministériu Solidariedade Sosiál no Inkluzaun (MSSI) hatudu inisiativa di’ak liuhusi programa apoiu ai-han báziku ba família vulnerável sira iha suku rua ne’e.
“Ami sente orgullu tanba MSSI iha inisiativa di’ak atu ajuda ai-han ba família vulnerável sira iha suku rua. Tan ne’e, ami nu’udár autoridade lokál hakarak rekomenda ba MSSI atu kontinua tau-matan ba família sira-ne’ebé presiza apoiu. Nune’e, karik ami iha pedidu ruma, ami bele aprezenta ba MSSI,” Eduardo Soares hateten ba TATOLI, iha Postu Administrativu Lakluta, Segunda ne’e.
Autoridade komunitária ne’e hatutan katak, maski apoiu ne’ebé MSSI oferese la boot, maibé bele ajuda família benefisiária sira atu sustenta sira-nia nesesidade alimentár durante loron ida ka rua.
“Maski apoiu ne’e uitoan, maibé bele ajuda ona família vulnerável sira. Iha ami-nia suku, família benefisiária sira-ne’ebé rejistada hanesan idozu no ema ho defisiénsia hamutuk na’in-150 iha Suku Uma-Tolu no na’in-150 iha Suku Dilór. Nune’e, totál benefisiáriu husi suku rua ne’e hamutuk na’in-300 ne’ebé simu ai-han báziku husi MSSI,” nia relata.
Nia esplika katak ai-han báziku ne’ebé MSSI distribui ba família benefisiária na’in-300 ne’e inklui foos, bikuit, susu-been, sardina no supermie.
Iha fatin hanesan, Ministra Solidariedade Sosiál no Inkluzaun (MSSI), Verónica das Dores, esplika katak distribuisaun ai-han ne’e iha objetivu atu ajuda família sira hetan ai-han sufisiente hodi sustenta sira-nia moris loroloron, garante nesesidade nutrisionál bázika ba saúde no hametin solidariedade sosiál.
“Governu mós kumpre ninia responsabilidade atu tau-matan ho dignidade ba sidadaun sira-ne’ebé presiza apoiu ai-han,” Ministra Verónica subliña.
Distribuisaun ai-han báziku ba família vulnerável iha Suku Uma-Tolu no Suku Dilór ne’e mós hetan partisipasaun husi autoridade munisipál, reprezentante Komandante PNTL Munisípiu Vikeke, autoridade lokál no komunidade husi suku rua ne’e.
Kontestu
Governu Timor-Leste, liuhusi Ministériu Solidariedade Sosiál no Inkluzaun (MSSI), kontinua implementa programa asisténsia sosiál no umanitária ba família vulnerável, inklui ema ho defisiénsia no idozu, hodi responde ba nesesidade bázika no hadi’a sira-nia kondisaun moris.
Iha tinan 2026, MSSI relata katak durante tinan 2025 to’o períodu daruak 2026, ministériu ne’e fó ona apoiu foos no ai-han komplementár ba família vulnerável hamutuk 21.388 iha territóriu Timor-Leste.
Klik notísia relevante sira iha kraik hodi lee:
- MSSI apoiu foos no ai-han komplementár ba família vulnerável hamutuk 21.388
- SSI Vikeke apoia foos saka 760 ba família vulnerável
- MSSI apoia asisténsia umanitária ba família vulnerável no EhD iha Ataúru
Jornalista: Vitorino Lopes da Costa
Editór: Xisto Freitas da Piedade

