MSSI apoia asisténsia umanitária ba família vulnerável no EhD iha Ataúru

ATAÚRU, 28 Outubru 2026 (TATOLI)—Vise-Ministra Solidariedade Sosiál no Inkluzaun, Céu Brites, hamutuk ho ekipa halo audiénsia ho benefisiáriu Bolsa da Mãe Kondisionál (BdMK) na’in-26, apoia asisténsia umanitária ba família vulnerável hamutuk na’in-250 no apoiu pontuál ba Ema ho Difisiénsia (EhD) na’in-rua iha Aldeia Adara, Atekru no Maker iha Ataúro.
Vise-Ministra Solidariedade Sosiál no Inkluzaun, Céu Brites, hateten objetivu sira-nia prezensa iha fatin ida-ne’e hodi ko’alia kona-ba asuntu Bolsa da Mãe Kondisionál (BdMK) ho tutór ka inan-aman husi benefisiáriu sira hamutuk na’in-26, apoiu umanitária iha Aldeia Adara, Atekuru no Maker.
Ohin loron, sira hamutuk ho ekipa integradu ne’ebé kompostu husi MSSI, MS, MAE, MJ no Organizasaun Naun Governamentál Naroman ba Futuru halo vizita ba Ataúru.

“Programa integradu ne’e nu’udar programa IX-Governu konstitusionál nian ho objetivu atu servisu ka fó asisténsia ba ita-nia komunidade, saida mak sira presiza durante ne’e liuliu asesibilidade ba saúde, dokumentu komprovativu (RDTL, BI no Eleitorál), parte saúde fó konsulta nehan no NGO Naroman ba Futuru fó konsultasaun matan,” Vise-Ministra relata ba Agência Tatoli iha Atekuru Ataúru, ohin.
Tanba ne’e, nia solisita ba inan-aman sira atu utiliza osan ne’ebé Governu apoiu ba nesesidade oan nian hanesan sosa materiál ba eskola, sosan aihán nutritivu, la’ós lori osan ba asuntu sira seluk hanesan halo lia, joga karta.
“Tanba tuir ami-nia servasaun benefisiáriu sira-ne’e balun hetan valór di’ak iha sira-nia eskola, tanba ne’e ami hakarak promove nafatin sira to’o tinan 16, tanba bainhira ho idade 17 sei labele sai ona benefisiáriu ba programa BdMK,” nia esplika.
Governante ne’e reforsa tan katak iha oportunidade ne’e mós fahe asisténsia umanitária hanesan foos no pakote komplementár (mina goreng, deho, masin, masin-midar, susu-been) ba família hamutuk 250 ne’ebé ninia nesesidade sufisiente hela.
“Atividade la’ós to’o ne’e de’it maibé ami mós sei vizita malun difisiénsia na’in-rua iha aldeia Maker hodi fó apoiu pontuál hanesan ekipamentu kadeira roda no orsamentu ba sira atu ajuda loke sira-nia negósiu hodi dezenvolve ekonomina ne’ebé bele auto-sustentavel,” nia subliña.
Signifika apoiu pontuál ne’ebé Governu liuhusi MSSI fó ne’e hahú husi $200 ba leten, maibé depende ba kondisaun ida-ida husi benefisiáriu nian.
Tuir Diretór, NGO Naroman ba Futuru, Leonel Ximenes Barbosa, hateten katak konsultasaun matan ne’e importante tebes ba inan-aman sira atu kontinua iha matan ne’ebé mak di’ak hodi haree no lee.
“Bainhira ita iha kondisaun matan ne’ebé ladi’ak sai preokupasaun mai ita hodi haree, tanba ne’e ohin ita sei halo konsultasaun matan gratuita ba komunidade sira husi idade 41 ba leten iha aldeia Adara, Atekru no Maker,” Diretór ne’e dehan.
Nia hatutan, oklu ida-ne’e ho tipu ultravioleta ne’ebé bele tahan matan husi loromatan no oklu ne’ebé sira prepara hamutuk 600, maibé iha konsultasaun sira rejistu komunidade na’in-61 mak halo konsulta no na’in-59 mak hetan oklu enkuantu na’in-rua la’e tanba kondisaun matan sei di’ak.
Reprezentante inan-aman husi Benefisiáriu BdMK, Santiago dos Santos, hateten katak osan ne’ebé durante ne’e nia oan simu husi MSSI uza ba nesesidade oan nian ba eskola.
“Osan sira-ne’e ami uza hodi sosa labarik nia farda, no materiál ba eskola nian, entaun osan ne’e rasik ami la uza ba joga ka ami-nia nesesidade individuál maibé ba oan nia presiza,” nia dehan.
Nia hatutan, osan ne’ebé durante ne’e nia oan simu ba kada tinan hamutuk $90 tanba nia oan na’in ida mak sai benefísiariu no daudaun ne’e tuur iha banku ensinu báziku fillial (4°-ano).
Iha vizita ba benefisiáriu ema ho difisiénsia Ronaldino Pereira (difisiénsia fíziku absoluta) no Pedro de Jesus (difisiénsia fíziku, matan no tilun) iha aldeia Maker, Vise Ministra ho ekipa sa’e bero kiik hodi fó apoiu pontuál hanesan osan no bebida, sereál no kadeira roda ida
Tuir obeservasaun jornalista iha terrenu Vise-Ministra enkoraja tebes família vulnerável ne’e no hakarak lori benefisiáriu sira ba halo tratamentu iha Sentru Nasionál Reabilitasaun, maibé iha parte balun família lakohi tanba ema laiha atu haree sira-nia uma, animál no labarik mesak kiik iha uma.
Enkuantu iha loron 29 fulan-Outobru mós, MSSI sei kontinua fó asisténsia umanitária ba BdMK no EhD iha Suku Villa Maumeta Ataúro. Iha loron 30 sei kontinua vizita domisiliáriu ba utente hodi entrega apoiu pontuál ba EhD na’in-rua iha suku Bikeli.
Jornalista : Alexandra da Costa
Editór : Cancio Ximenes

