MSSI fó apoiu ba benefisiáriu Bolsa da Mãe Kondisonál 51 iha Vila Maumeta
ATAÚRU, 29 Outubru 2026 (TATOLI)—Governu liuhusi Ministériu Solidariedade Sosiál no Inkluzaun (MSSI) fó apoia asisténsia umanitária hanesan aihan komplementár ba benefisiáriu Bolsa da Mãe Kondisionál (BdMK) na’in-56 iha Aldeia Eklae, Ilimanu no Iletikarakia, Suku Villa Maumeta.
Vise-Ministra Solidariedade Sosiál no Inkluzaun, Céu Brites, hateten atividade ida ohin nian hanesan kontinuasaun husi atividade ne’ebé sira hala’o horisehik iha Atekuru, Adara no Maker, ne’ebé ko’alia kona-ba programa Bolsa da Mãe Kondisionál (BdMK), konsulta matan, nehan gratuita no apia asisténsia umanitária ba komunidade vulnerável sira.
“Entaun apoiu ne’ebé ita fó atu inan-aman sira uza osan ne’e ba oan sira-nia nesesidade tanba Governu liuhusi MSSI fó osan ne’e ba labarik sira hodi ajuda sosa sira-nia materiál eskola nian no mós bainhira sira moras bele lori ba sentru saúde inklui sosa aihan nutritive,” Vise-Ministra Solidariedade Sosiál no Inkluzaun, Céu Brites, hateten ba Agência Tatoli iha Villa Maumeta Ataúru, ohin.
Governante ne’e dehan, dezlokasaun ida-ne’e la’ós de’it MSSI maibé kompostu husi servisu integradu hanesan MS, MAE, CNR, PNTL no NGO Naroman ba Futuru.
“Ekipa sira-ne’e ida-idak ezerse ninia funsaun hodi tulun komunidade ne’ebé nafatin hetan obstákulu liu asesibilidade ba dokumentu kompromativu, saúde no edukasaun,” nia dehan.
Nia dehan kona-ba programa Bolsa da Mãe Kondisionál nian iha aldeia Eklae, Ilimanu,
Iletikarakia, suku Vila Maumeta hamutuk na’in-56 no benefisiáriu ba apoia asisténsia umanitária mós hanesan hamutuk família na’in-56, iha konsulta matan nian hamutuk ema na’in-65.
Enkuantu nia hatutan hafoin remata atividade ne’e sira sei kontinua ba vizita benefisiáriu Ema ho Difisiénsia (EhD) na’in haat ne’ebé iha problema psikolójia (saúde mentál) hodi fó apoiu osan $200.
“Tanba durante ne’e programa kona-ba apoiu pontuál ne’e hahú kedas iha tinan 2025, ha’u rasik mak servisu hamutuk ho Diretór portadores EhD ho objetivu fó apoiu maibé tenke empodera sira-nia ekonómiku, ne’ebé to’o ohin loron ita apoia ona benefisiáriu hamutuk na’in-44 iha territóriu nasionál,” nia haktuir.
Iha biban ne’e tuir benefisiáriu iha aldeia Ilimanu, Sonia Cabeças da Gonçalo, hato’o agradese ba Governu ne’ebé fó ona apoiu aihán komplementár ba sira.
“Ami kontente tebes ohin ami simu aihán husi Governu nian liuliu ba ami hanesan benefisiáriu bolsa da mãe kondisionál,” nia dehann.
Tanba ne’e nia nafatin rekomenda ba Governu atu kontinua mantein programa ida-ne’e atu bele suporta nafatin sira-nia nesesidade.
Iha vizita ba domisiliáriu utente EhD Herminia Cabeças ne’ebé difisiénsia tilun, Inaçio Cabeças iha difisiénsia tilun no ko’alia no Maria Madalena Cabeças, Vise-Ministra enkoraja sira halo eplikasaun ba sira atu ba tuir tratamentu iha Sentru Nasionál Reabilitasaun iha Dili.
Nune’e família mós pontru koopera no sira deside liu tiha loron finadu sira sei akompañia benefisiáriu hirak ne’e ba halo tratamentu iha CNR Dili.
Jornalista : Alexandra da Costa
Editór : Cancio Ximenes
