Governu enkoraja joven sira hakerek istória Ataúru hatutan ba jerasaun foun sira
ATAÚRU, 30 Outobru 2026 (TATOLI)—Governu liuhusi Vise-Ministra Solidsriedade Sosiál no Inkluzaun (MSSI), Céu Brites, enkoraja komunidade no joven sira iha Ataúro atu hakerek istória rezisténsia hahú husi tinan 1975 to’o 2002 hodi hatutan ba jerasaun foun sira.
“Liuliu idozu sira-ne’ebé hetan sofrementu, ameasa, troturasaun, iha tempu referendu, Ataúru fatin hakmatek maibé iha munisípiu sira seluk uluk ema mate barak ba rai ida-ne’e,” Vise-Ministra ne’e hateten ba komunidade no joven sira iha Ataúro, ohin.
Maibé, nia dehan, Ataúru mós iha ninia istória rasik ne’ebé mak moruk, tanba iha tempu invazaun Indonézia ita bolu illa ne’e nu’udar illa prizaun. Tanba, tropa Indonézia lori ema barak destera tiha mai Ataúru atu nune’e feto sira labele iha kontaktu ho sira-nia kaben, aman no maun ne’ebé luta hela iha ai-laran.
“Nune’e, istória sira-ne’e ita labele haluha, ita tenke hakerek. Ha’u hatene ita ida-idak iha nia istória, entaun presiza hakerek hodi hatutan ba jerasaun foun sira, maske pájina ida ka rua de’it,” nia dehan.
Nia hateten, istória ne’ebé hakerek sei prezerva iha eskola hanesan iha fatin biblioteka fó ba labarik kiik sira asesu hodi hatene katak Ataúru mós iha ninia istória.
“Ita haree tasi furak kapaas loos maibé nia mós iha istória ne’ebé moruk tebes. Triste tebes bainhira iha rona istória Ataúro nian. Ema iha ne’e hahan laiha, isin mesak ruin de’it, ami iha Austrália ami sente bainhira haree iha fotografia, ha’u triste tebes. Maibé agora ita ukun-an ona entaun agradese ba Maromak,” nia hateten.
Jornalista : Alexandra da Costa
Editór : Cancio Ximenes
