Top

GASC Apoiu $109.300 konstrui edifísiu foun RENETIL iha Palapasu

Lansamentu fatuk dahuluk ba edifisiu foun RENETIL iha Palapasu Dili. Imajen Tatoli/ Hortêncio Sanchez.

DILI, 19 Novembru 2026 (TATOLI)—Koordenadór Gabinete Apoiu ba Sosiedade Sivíl (GASC), Joaquim Freitas, lansa fatuk dahuluk no apoia konstrusaun edifísiu foun RENETIL iha Palapasu, ho fundu hamutuk $109.300,00.

Nia hatutan, Gabinete Apoiu ba Sosiedade Sivíl (GASC) fó apoiu ba organizasaun sira hotu-hotu ne’ebé iha baze legál no RENETIL hanesan organizasaun ne’ebé ninia ezisténsia mai husi rezisténsia.

“GASC fó apoiu ba organizasaun sira hotu-hotu ne’ebé mak baze legál ne’e katak organizasaun nia ezisténsia hanesan rezisténsia,” Joaquim Freitas hateten ba jornalista sira hafoin ramata lansa fatuk dahuluk, ohin.

Nia esplika, RENETIL rejista iha Ministériu Justisa hanesan organizasaun sosiedade sivíl ne’ebé halo atendimentu públiku no ba ninia membru sira.

“Tanba ida-ne’e, laiha razaun atu hateten RENETIL laiha direitu ba fundu Gabinete Apoiu ba Sosiedade Sivíl,” nia hateten.

Joaquim Freitas hatutan, la’os RENETIL de’it maibé GASC mós iha tinan barak fó apoiu ba organizasaun lubuk ida-ne’ebé mai husi grupu rezisténsia nian.

“Atribuisaun ida-ne’e ami espera katak nia sei hotu tuir tempu no bele kontinua halo nia funsaun ida interven iha edukasaun sívika atu hasa’e konsiénsia joven sira-nia valór sira-ne’ebé RENETIL kaer luta hasoru Indonézia,” nia hateten.

Nia hatutan, tanba ne’e mak iha urjénsia no organizasaun ida merese atu hetan apoiu ida-ne’e, hodi foku liu ba sira-nia programa ba joven no estudante sira.

Lansamentu fatuk dahuluk ba edifisiu foun RENETIL iha Palapasu Dili. Imajen Tatoli/ Hortêncio Sanchez.

Iha fatin hanesan, Sekretáriu-Jerál RENETIL, José Ave Maria Ximenes, hateten atu harii sede ne’e la’ós husi ezekutivu foun ne’e, maibé hahú tiha husi ezekutivu anterir.

“Atu harii sede ne’e la’os husi ezekutivu foun ne’e, maibé hahú tiha ezekutivu anteriór, maibé kongresu hili fali ha’u nu’udar ezekutivu, ha’u kontinua fó kontinuidade hala’o projetu ne’e tomak,” José Ave Maria Ximenes dehan.

Nia esplika, RENETIL iha ninia membru barak ne’ebé fó lisuk hanoin oinsá halo dezeñu ba uma ida ne’e, no iha aspetu seluk, ekipa tékniku ida mak hola kna’ar servisu sira-ne’e hotu.

Nia hatutan, kona-ba nome de kompaña, nia rasik uza prosesu ne’ebé iha, ne’ebé agora apoiu husi Gabinete Sosiedade Sivíl no mais adiante apoiu ho ninia membru rasik.

José Ave Maria Ximenes hateten, sede ne’e ninia vernakularidade arkitetónika reflete ba pasadu, prezente no futuru.

Nia esplika, signifika haree ba kotuk uitoan istória perkursu mai to’o ohin loron, nu’udar atu afirma depois nia projeta ba jerasaun foun tuir mai.

Jornalista : Hortêncio Sanchez

Editór       : Cancio Ximenes

Publisidade

Leave a Reply

Latest Post

error: Content is protected !!