Vise-Ministra Céu Brites entusiazmu ho paisajen Ataúru
ATAÚRU, 28 Outubru 2026 (TATOLI)—Vise-Ministra Solidariedade Sosiál no Inkluzaun, Céu Brites, entusiazmu (laran monu) ho paisajen iha Ataúru ne’ebé iha potensia boot bele diversifika sira-nia ekonomia interna.
Vise-Ministra ne’e hateten kestaun ne’e tanba bainhira hamutuk ho ekipa integradu sira halo vizita traballu ba iha Aldeia Adara, Atekuru no Maker, Suku Beloi Ataúru.
“Fatin ne’e kapaas tebes. Ha’u la’o ha’u haree potensialidade ba fatin turizmu ne’ebé bele loke iha Ataúru,” nia dehan.
Governante ne’e subliña katak importánsia loke fatin turizmu iha ne’e tanba bele ajuda mós kria empregu ba Ataúrouoan sira, entaun ema hotu-hotu iha ne’e bele servisu besik ho familía ka la presiza tan ba iha kapitál.
“Bainhira ita dezenvolve fatin ne’e sai furak sei bele atrai ema husi estranjeiru no lokál sira mai vizita, ne’e mós bele diversifika ita-nia ekonomia ba sustentabilidade familiár no rai ida-ne’e,” nia dehan.
Nia hatutan, dezenvolve rai bele ajuda fó moris no bokur ba povu, nune’e presiza prezerva paisajen furak ida-ne’e hodi sai rekursu poténsia ida iha Ataúru.
Tuir observasaun ne’ebé jornalista halo iha terrenu kuaze turista husi nasaun oioin barak mak gosta vizita Ataúru, sira gosta luku tasi okos hodi haree rikeza hanesan ikan, ahu-ruin no seluk tan. Aleinde kondisaun tasi moos tebes halo ita bele haree hetan ahu-ruin no ikan oan sira iha tasi laran.
Jornalista : Alexandra Costa
Editór : Cancio Ximenes
