Indía sei sai uma-na’in ba kompetisaun WorldSkills Asia iha 2027

DILI, 18 Novembru 2026 (TATOLI)—Diretora Institutu Nasionál Dezenvolvimentu Mão-de-Obra (INDIMO, sigla portugés), Isabel Fernandes de Lima, hateten iha tinan 2027 ne’e Indía mak sei sai uma-na’in ba kompetisaun Asembleia Jerál WorldSkills Asia.
“Tanba ne’e mak ohin reprezentante husi nasaun Indía halo sira-nia aprezentasaun atu sai uma-na’in ba iha kompetisaun Worldskills Asia 2027 iha fulan-Dezembru iha Delhi,” Diretora ne’e relata ba jornalista sira iha Hotél Palm Speing, ohin.
Drijente ne’e afirma katak iha plenária ohin loron ne’e, Indía sei aprezenta sira-nia preparasaun ba tinan oin nian
Nia hatutan, ohin mós sira halo votasaun ba lideransa sira iha WorldSkill Asia nian inklui nasaun membru foun ne’ebé hakarak inklina-an iha organizasaun internasionál ida-ne’e mak Austrália, Vanuatu no Repúblika Siria.
“Ita mós halo admisaun ba nasaun tolu ne’ebé hakarak sai membru iha WorldSkills Asia, entaun agora sira iha membru hamutuk 33,” nia dehan.
Enkuantu, nia hatutan kona-ba Asembleia jerál WorldSkills Asia 2026 ne’ebé realiza iha Timor-Leste ho totál gastu hamutuk rihun $40 ba akomodasaun delegasaun nasaun membru sira, preparasaun transporta, seguransa no saúde.
Iha sorin seluk, tuir membru foun husi Austrália Xefe Ezekutivu Oficer, Trevor Schwenke sente orgullu tebes tanba ohin loron sira sai membru ba WorldSkills Asia.
“WorldSkills Austrália sai ona membru WorldSkills Internationál hahú husi tinan 1981. Nune’e, ami envolve ona iha WorldSkills durante tinan 45. Ida-ne’e tempu naruk tebes. Iha Austrália, ami iha istória ne’ebé orgullu tebes kona-ba kualidade iha área dezenvolvimentu kapasidade no abilidade profisionál,” xefe ezekutivu ne’e dehan.
Agora, nia dehan, sira hakarak habelar tan sira-nia rede no partisipasaun, atu sai parte husi rejiaun Ázia no Pasífiku, no fahe sira-nia koñesimentu, kapasidade no abilidade ho rejiaun tomak.
“Ba ami, ida-ne’e la’ós de’it kona-ba kompetisaun. Maibé, ida-ne’e mós oportunidade atu hamutuk ho ema seluk, halo interasaun no fahe esperiénsia kona-ba buat ne’ebé ami halo. Iha tempu hanesan, ami mós bele aprende buat barak husi ema seluk,” nia hateten.
Tanba ne’e, nia mós hakarak hato’o agradesimentu ba kolega sira husi ekipa Timor-Leste no WorldSkills, ne’ebé simu no halo introdsaun kona-ba sira ho di’ak tebes atu bele partisipa iha eventu importante ida-ne’e.
“Ha’u fiar katak, iha futuru, liuhusi WorldSkills Asia, ami-nia kolaborasaun sei sai forte liután,” nia dehan.
Jornalista : Alexandra da Costa
Editór : Cancio Ximenes

