Top

Alfandega rejista reseita Estadu TL hamutuk millaun $113.82

Osan Dólar Amérika. Imajen/Espesiál

DILI, 18 Novembru 2026 (TATOLI)–Autoridade Aduneira (Alfándega) ne’ebé tutela iha  Ministériu Finansa rejista reseita Estadu nian hamutuk millaun $113.82 husi Janeiru to’o Outubru 2026, ho kontribuisaun boot-liu mai husi impostu ba taxa espesiál no impostu ba venda.

Tuir relatóriu reseita Alfándega 2026 nian, totál reseita ne’ebé rekolla to’o fulan-Outubru nia rohan atinje $113.821.329,65.

Husi montante ida-ne’e, impostu espesiál mak sai hanesan kontribuinte prinsipál ba reseita, ne’ebé atinje maizumenus millaun $60.49. Entretantu, taxa alfándega importasaun kontribui maizumenus millaun $25.15 no taxa venda maizumenus millaun US$27.35.

Aleinde komponente tolu ne’e, reseita mós hetan husi taxa administrativa no prosesamentu dokumentu, reseita sira seluk no multa ne’ebé impoin durante operasaun alfándega nian.

Dadus ne’e hatudu katak reseita Alfándega mai la’ós de’it husi atividade importasaun, maibé mós husi obrigasaun tributária no administrativa oioin relasiona ho fiskalizasaun komérsiu transfronteirisu.

Haree tuir fatin rekolla, eskritóriu Alfándega sira-ne’ebé kaer atividade iha Portu Dili no Tibar mak kontribui barak liu ba reseita totál.

Husi Janeiru to’o Outubru 2026, reseita husi Portu Dili/Tibar rejista hamutuk $109.854.488,77 ka maizumenus pursentu 96,5 husi totál reseita Alfándega.

Entretantu, eskritóriu Alfándega iha Batugade rejista reseita hamutuk $1.961.320,89, tuir fali Aeroportu Internasionál Dili ho US$1.244.992,25.

Kontribuisaun sira seluk mai husi postu servisu alfándega oioin, inklui Maliana–Tunibibi, Oekusi–Oesilo, Oecusse–Sakato, Aeroportu Suai no servisu postál sira.

Kontribuisaun signifikante husi Portu Dili no Tibar hatudu dominasaun husi instalasaun portu rua ne e iha Timor-Leste nia estrutura reseita alfandega durante períodu relatóriu tomak.

Relatóriu hanesan hatudu katak reseita Alfándega nian flutua hosi fulan ba fulan durante fulan sanulu dahuluk tinan 2026 nian.

Bazeia ba gráfiku reseita mensál, fulan-setembru mak fulan ho reseita aas liu, enkuantu iha fulan-Outubru reseita fila-fali ba purvolta millaun $11.

Fluktuasaun ne’e hatudu diferensa iha valór reseita ne’ebé rejista husi atividade alfándega kada fulan.

Diretór Nasionál Operasaun Autoridade Alfándega, Ivo Manuel da Ressurreição Ferreira Gomes, esplika iha konferénsia imprensa iha Díli, kuarta-feira ne’e, katak ninia ajénsia responsável ba monitorizasaun ba sasán sira ne’ebé tama iha Timor-Leste no rekolla impostu tuir lei nasionál.

Nia haktuir, Alfándega nia knaar inklui inspesaun dokumentu, klasifikasaun sasán, kalkulasaun impostu no monitorizasaun ba sasán sira-ne’ebé presiza kontrolu espesiál.

Nia esplika, implementasaun kna’ar hirak ne’e bazeia ba Lei Tributária Númeru 8/2008 loron 30 fulan-Jullu no provizaun prosesuál alfándega nian ne’ebé hatuur ona iha Dekretu-Lei númeru 14/2017 loron 5 fulan-Abríl.

Autoridade ne’e subliña katak kobransa impostu nu’udar obrigasaun ida husi ajénsia ne’e atu apoia reseita Estadu nian, enkuantu mós tau matan ba sasán sira-ne’ebé tama liuhusi portu, aeroportu, fronteira terestre no servisu postál sira.

To’o finál Outubru 2026, reseita millaun $113.82 reflete realizasaun durante fulan sanulu dahuluk tinan atuál nian no la inklui reseita sira hosi Novembru no Dezembru.

Jornalista : Felicidade Ximenes

Editór        : Cancio Ximenes

Publisidade

Leave a Reply

Latest Post

error: Content is protected !!