PN husu Governu konstrui terminál pasajeiru ba transporte públiku

DILI, 10 Novembru 2026 (TATOLI)—Deputadu Bankada CNRT, Romeo Moizes, husu ba Ministériu Transporte no Komunikasaun (MTK) atu konstrui terminál pasajeiru ba transporte públiku sira hanesan bus husi parte súl, leste no oeste.

“Bus barak mak hatun tiha pasajeiru hotu sira ba para de’it iha sira-nia uma no bainhira pasajeiru sira kontaktu mak motorista sira foin ba tula iha ida-idak nia fatin,” Deputadu ne’e deklara iha diskusaun OJE 2027 iha Parlamentu Nasionál, ohin.

Nia haktuir, bus husi Lospalos nian para de’it iha tasi-ibun parte praia dos Coqueiros nian, bus Suai para de’it iha Kampung Baru, bus Bobonaru para de’it iha área Delta nian.

“Ida-ne’e ha’u ko’alia la’o tanba ha’u bankada Governu ne’ebé tenke fó apresiasaun de’it ne’e la’e, maibé tau osan atu ita-boot sira tenke implementa, tanba ne’e mós povu nia nesesidade,”  nia apela.

Iha biban ne’e, Ministru Transporte no Komunikasaun, Miguel Gonçalves Manetelu, dehan kona-ba konstrusaun terminál pasajeiru ba transporte públiku ne’e iha hela prosesu la’o hela no ekipa tékniku kompañia nian halo hela dezeñu.

“Kompañia mak halo rasik dezeñu la’ós husi ADN, depois mak ami sei aprezenta bainhira dezeñu konklui ona,” nia dehan.

Nia hatutan, kona-ba atu prevee orsamentu ruma ba iha obra ida-ne’e seidauk iha serteza tanba sei iha prosesu dezeñu, bainhira konklui ona maka ita sei ko’alia kona-ba asuntu ne’e iha reuniaun KAFI.

Enkuantu. antes ne’e Governu identifika fatin tolu sai alvu atu konstrui terminál pasajeiru ba transporte públiku mak iha parte terminál Bekora, ne’ebé sei akumula transporte husi munisípiu Lospalos, Víkeke, Baukau no Manatutu, enkuantu bis husi Munisípiu Kovalima, Ainaru, Same sei para iha terminál Manleuana no bus husi parte Bobonaru, Ermera sei para iha terminál Tasi-Tolu.

Jornalista : Alexandra da Costa

Editór        : Cancio Ximenes