MSSI no Naroman ba Futuru distribui oklu ba benefisiáriu 35 iha Bikeli
ATAÚRU, 30 Outubru 2026 (TATOLI)—Ministériu Solidariedade Sosiál no Inkluzaun (MSSI) hamutuk ho Organizasaun Naun-Governamentál Naroman ba Futuru distribui oklu ba benefisiáriu na’in-35 ne’ebé sira-nia matan haree ladun moos iha suku Bikeli, Ataúru.
Vise-Ministra Solidariedade Sosiál no Inkluzaun, Céu Brites, dehan objetivu sira-nia prezensa iha ne’e hodi distribui oklu ba benefisiáriu sira-ne’ebé antes ne’e halo ona konsulta matan gratuita iha fulan-Jullu maibé estoké oklu mak la to’o atu fahe iha momentu ne’e.
“Ami mai atu entrega oklu sira-ne’ebé iha fulan-Jullu ita hamutuk ho ekipa NGO Naroman ba Futuru halo konsulta ba matan,” Vise-Ministra hateten ba komunidade iha suku Bikeli, ohin.
Governante ne’e relata, loron rua liubá mós sira halo distribuisaun oklu liuhusi konsulta matan gratuita iha aldeia Adara, Atekru no Maker no horiseik iha suku Villa Maumeta.
“Ida-ne’e mak papel husi MSSI halo ba komunidade, bainhira sira presiza bele informa ba ita-nia sentru destakadu iha Ataúru, atu ita buka dalan hodi ajuda sira,” nia informa.
Nia fiar katak ho distribuisaun oklu ida-ne’e benefisiáriu sira bele ona halo sira-nia atividade hanesan suku, lee, homan no bahat produtu artezanatu inklui suku rede ba peska nian ho di’ak ona.
Iha oportunidade ne’e, tuir benefisiária iha suku Bikeli, Casilda Alves de Araújo, hato’o agradesimentu ba Governu no NGO Naroman ba Futuru, tanba bele fó ona oklu ba nia uza hodi halo atividade.
“Durante ne’e ha’u-nia matan ladun moos, entaun difikulta tebes ha’u atu haree hodi suku roupa no homan biti maibé ohin loron ba oin ha’u bele haree tanba iha ona oklu,” nia dehan.
Tanba ne’e, nia dehan, sei kuidadu oklu ne’ebé Governu oferese atu uza ba tinan naruk nia laran.
Enkuantu iha oportunidade ne’e mós Vise-Ministra hamutuk ho ekipa halo vizita ba Aldeia Iliknamo, Suku Bikeli hodi apoiu pontuál ba benefisiáriu Ema ho Difisiénsia, Tarcis Soares Pereira, ne’ebé sofre difisiénsia tilun no ko’alia.
To’o ne’ebá, sira observa katak benefisiária ne’e bele hakerek maibé ko’alia lahatene no la rona, nune’e sira rekomenda atu lori ba tuir formasaun lian jestuál iha KDTL hafoin kontinua halo tratamentu iha Sentru Nasionál Reabilitasaun.
Jornalista : Alexandra da Costa
Editór : Cancio Ximenes
