Top

Autopsia ba mate-isin Palomita finaliza no entrega ona ba família

Matebian Palomita Gusmao Guterres. Imajen/Espesiál.

DILI, 19 Novembru 2026 (TATOLI)—Hospitál Nasionál Guido Valadares, kinta ne’e, halo autopsia ba mate-isin matebian Palomita Gusmao Guterres tanba kazu omesídiu ne’ebé mak akontese iha loron 18 fulan-Novembru tinan 2026, maizumenus iha tuku 15h00 lorokraik iha Tasi-Tolu, Aldeia 12 Outubru, Suku Komoro, Postu Administrativu Dom Aleixo, Munisípiu Dili, ne’ebé finaliza no entrega ona mate-isin ba família.

Xefe Departamentu Forénsik iha Hospitál Nasionál Guido Valadares, Nilton Tilman dehan kona ba kazu ida ne’ebé mak akontese iha loron 18 fulan-Novembru ne’ebé víral iha mídia sosiál tanba kazu omesídiu ida-ne’ebé mak halo vítima labele salva nia vida.

“Realidade ita hasoru ho situasaun ne’ebé mak ladi’ak ho situasaun triste no situasaun ne’ebé ke liafuan ida ne’ebé mak atu deskreve laiha no trajen tebe-tebes, tanba kazu krime ida-ne’ebé mak ita hotu-hotu akompaña iha mídia sosiál masimu tebes no intensivu tebes horisehik ne’e kuaze segredu saida-saida de’it kanek saida mak iha ita-nia alin feto nia isin lolon ne’e saida maka akontese ba nia ne’e kuaze 95% ema hotu-hotu hatene hotu kedas,” Nilton Tilman ba Jornalista sira iha nian kna’ar fatin, Mortuáriu HNGV, ohin.

Nia esplika, haree sirkustansia ne’e hotu sira akompaña durante 24 oras nia laran ne’e, kazu ida ne’e sériu tebes ba públiku.

“Ita haree kazu ne’e sériu tebes ba ita hotu no kazu ne’e boot tebes tanba komete husi buat   kiik tanba sira ho idade produtivu, tanba sira nia futuru sei naruk no nasaun ida-ne’e nia futuru iha sira-nia liman. Maibé, felizmente ho situasaun ida0ne’e ho trajen ita hotu la espera ida-ne’e parte kompetente sira bele interven kazu ne’e no ita hein prosedimentu sira tanba agora daudaun ne’e la’o hela,” nia haktuir.

Nia afirma, autór ne’e detein hela iha sela polísia nian ona, kadaver daudaun ne’e iha hela sala mortuariu Hospitál Nasionál Guido Valadares no prosesu ba autopsia.

“Autopsia ne’e sei agora, tuir loloos ohin dadeer atu halo ona maibé tanba mate ne’e sadis tebes entaun ita fó fali tempu ba parte kompotente sira halo servisu. Maibé kona-ba motivu no lala’ok no kronolojia ba kazu ne’e. Mandadu horisehik sai tiha ona no tuir loloos iha dadeer ne’e ita halo ona autopsia maibé  komu ita-nia mákina konjelador ne’e temperatura nian malirin tebes no kadaver ne’e isin tiha, purtantu ita hein oras tan nabeen tiha ita bele halo ona autopsia,” nia esplika.

Nia relata, autopsia ida-ne’e sei han kuaze oras ida ka rua, depois autopsia Hospitál Nasionál Guido Valadares sei entrega nia rezultadu ba Ministériu Públiku, nune’e bele prosesu tuir lei ne’ebé mak eziste iha nasaun Timor-Leste.

“Orsida ita halo autopsia hotu ita sei entrega kadaver ba família no mós ita hlao fali rezultadu autopsia ba ne’e lori ba Ministériu Públiku, nune’e bele prosesu tuir lei ne’ebé mak iha ita-nia rain,” nia dehan.

Jornalista : Felicidade Ximenes

Editór        : Cancio Ximenes

Publisidade

Leave a Reply

Latest Post

error: Content is protected !!