Governu lansa fatuk dahuluk ba projetu reabilitasaun estrada urbana iha Likisa

LIKISÁ, 19 Novembru 2026 (TATOLI)—Governu liuhusi Primeiru-Ministru, Kay Rala Xanana Gusmão, Ministru Obra Públika (MOP), Samuel Marçal, hamutuk ho entidade oioin lansa fatuk dahuluk ba projetu reabilitasaun estrada urbana ne’ebé fahe ba pakote lima iha munisípiu Likisá.
Primeiru-Ministru, Kay Rala Xanana Gusmão, hateten Governu kontinua kria dezenvolvimentu infraestrutura bázika iha munisípiu sira hodi apoiu povu sira atu simu governasaun lokál ne’e sei integra iha tinan 2027.
“Atu hetan podér lokál autoridade munisipál sira tenke iha vizaun, ne’ebé bele implementa etapa ba etapa. Ne’eduni, iha kamára munisipál iha munisípiu ida ka rua mak sei simu, entaun sira seluk tenke aprende no esforsu nafatin,” Xefe Governu ne’e hateten iha atividade lansamentu estrada urbana iha Likisá, ohin.
PM Xanana dehan, vizaun la’ós iha Likisá de’it maibé iha fatin seluk mós presiza dezenvolvimentu infraestrutura bázika (alisersa ba dezenvolvimentu) ne’ebé sai nesesidade povu nian.
“Hanesan Governu nia esforsu kona-ba liña eletrifikasaun nian iha territóriu laran sei konklui iha tinan 2027, ita sei haree mós estrada sira, tanba bele fasilita asesibilidade ba edukasaun, saúde no merkadu,” nia dehan.
Tanba ne’e, nia husu ba parte hotu-hotu atu koopera no kontribui ba prosesu dezenvolvimentu ida-ne’e, tenke sai sasin ba obra hotu no garante kualidade.
Nune’e mós, tuir Ministru Obra Públiku, Samuel Marçal, ohin ita halo lamsamentu ida iha Likisá ne’e hatudu katak dezenvolvimentu ne’e ita hotu-hotu nian no ita hotu mak dezenvolve hodi harii nasaun ida-ne’e.
“Tanba ne’e, ha’u husu ba ita hotu-hotu katak obra ida-ne’e la’ós nasionál nian de’it maibé ita hotu nian. Nune’e ita iha dever atu tau matan liuliu ba joven sira labele hamosu impedimentu, hakarak servisu fó naran ba kompañia hodi servisu, labele estraga fasilidade sira,” Ministru Samuel apela.

Governante ne’e hatutan, atu garante obra ne’e ho kuakidade presiza hotu-hotu nia kontribuisaun no kompañia sira tenke implementa ho seriedade labele faan tutan ba kompañia seluk, tanba ida-ne’e sei la kria investimentu ba rekursu umanu iha setór privadu.
Prezidente Autoridade Munisípiu Likisá, Paulino Ribeiro, dehan ohin halibur hamutuk iha fatin ne’e atu marka momentu importante ida iha Munisípiu Likisá, liuhusi lansamentu projetu reabilitasaun estrada urbana nian.
“Ba ami, projetu ida-ne’e la’ós de’it reabilitasaun estrada maibé sai hanesan sinál konkretu katak nesesidade povu nian hetan atensaun no kompromisu Governu transforma sai asaun,” nia hateten.
Tanba ne’e mak autoridade munisipál ne’e hato’o agradesimentu ba Governu Konstitusionál da-sia, tanba kontinua fó prioridade ba dezenvolvimentu infraestrutura bázika iha rai ida-ne’e.
Estrada mak ligasaun entre komunidade ba eskola, postu saúde, merkadu, instituisaun públika no oportunidade ekonomia. Ho estrada ne’ebé di’ak, povu bele movimenta ho seguru, agrikultór bele transporta produtu ba merkadu, estudante bele asesu ba eskola no ema moras bele to’o lalais ba postu saúde.
“Tanba ne’e, ami hein katak projetu ida-ne’e bele implementa ho kualidade, tuir padraun tékniku no prazu kontratuál, atu benefísiu husi investimentu públiku bele to’o diretamente ba povu,” nia dehan.
Aleinde ne’e, nia mós hakarak apela ba kompañia lima ne’ebé sei implementa projetu ida-ne’e atu hala’o obra ho responsabilidade, transparénsia, integridade no profisionalizmu. Presiza fó atensaun ba kualidade materiál, espesifikasaun téknika, seguransa traballadór no prazu implementasaun.
“Ha’u mós husu ha kompañia sira atu fó oportunidade servisu ba joven no traballadór lokál husi Munisípiu Likisá, atu projeta ida-ne’e la’ós de’it konstrui estrada, maibé kria emprega ba juventude sira,” nia apela.
Enkuantu projetu reabilitasaun estrada urbana iha munisípiu Likisá ne’e fahe ba pakote lima, iha pakote dahuluk kuazé kilómetru haat-resin fó asesu projetu ne’e implementa husi kompañia Metalika Unip, Lda ho durasaun kontrantu tinan ida no osan hamutuk $3.663.419,33.
Pakote daruak konstrui husi kompañia Goubara Unip, Lda, ho osan hamutuk $3.667.738,50, durasaun tempu tinan ida.
Pakote datoluk mak husi implementa husi kompañia Aruiris Uni. Lda, ho osan hamutuk $3.666.729,58, durasaun tinan ida.
Pakote dahaat konstrui husi kompañia TJManipag Cupadtroy Unip, Lda ho montante osan hamutuk $4.411.512,31, durasaun tempu tinan ida.
Pakote dalima nian implementa husi kompañia Haksolok Unip, Lda, ho osan hamutuk $3.716.933,97, ho durasaun tempu tinan ida.
Jornalista : Alexandra da Costa
Editór : Cancio Ximenes

