Top

Reabilitasaun estrada urbana Baukau implementa iha pakote rua, progresu seidauk to’o 50%

KompañIa Jova hala'o reabilitasaun ba estrada urbana iha Munisípiu Baukau. Imajen TATOLI/Francisco Sony

BAUKAU, 19 Novembru 2026 (TATOLI)—Progresu fíziku reabilitasaun estrada urbana pakote dahuluk, husi Nagardjo to’o Ospitál Rejionál Eduardo Ximenes (HoREX-sigla portugeza), Munisípiu Baukau, atinje ona 42,45%. Maibé, falta alkatraun iha merkadu no hein aspál atu kontinua etapa konstrusaun tuirmai.

Koordenadór Tékniku Ministériu Obra Públika (MOP) Destakadu Munisípiu Baukau, Diego Caleza, esplika katak estrada ne’e nia naruk besik kilometru tolu. Atualmente, empreiteiru kontinua iha faze aplikasaun alkatraun bee, molok tama ba etapa tau aspál.

“Progresu agora daudaun previzaun iha ona 42,45%, maibé ita hein aspál to’o mai atu kontinua tau aspál iha parte sorin husi dalan ne’e,” Diego Caleza hateten iha nia kna’ar-fatin, Vila Nova, Kinta ne’e.

Caleza relata katak difikuldade prinsipál ne’ebé kompañia enfrenta mak falta matéria-prima iha merkadu, liuliu alkatraun. Tuir planu servisu, empreiteiru sei aplika alkatraun bee atu kobre parte estrada ho naruk liu kilometru rua, antes kontinua bá etapa tuirmai. Maibé, tanba limitasaun materiál, kompañia kontinua de’it ho servisu preparasaun no terraplanajen.

Aleinde pakote dahuluk, pakote daruak, ne’ebé hahú husi rotunda to’o Igreja Evangélica iha Tirilolo, foin atinje progresu fiziku liu 23%. Iha pakote ne’e, kompañia implementadora kontinua hala’o servisu iha terrenu.

“Afetadu sira maioria hetan ona indemnizasaun no osan tama ona ba sira-nia konta. Tanba ne’e, komunidade hatudu inisiativa di’ak hodi sobu rasik sira-nia rezidénsia,” Caleza haktuir.

Reabilitasaun estrada urbana iha Baukau Vila implementa iha pakote rua, ho durasaun servisu tinan rua. Pakote dahuluk, ne’ebé kobre estrada husi Nagardjo to’o HoREX, iha responsabilidade kompañia JOVA Construction Unipessoal, Lda., ho valór kontratu US$4.735.021,55.

Enkuantu pakote daruak, ne’ebé implementa husi Kompañia Vage’el Unipessoal, Lda., iha valór kontratu US$3.764.933,21.

Kontestu

Projetu reabilitasaun estrada urbana iha Baukau Vila lansa ofisialmente husi Primeiru-Ministru, Kay Rala Xanana Gusmão, iha 06 Fevereiru 2026. Projetu ne’e kobre estrada urbana ho naruk hamutuk kilómetru 23, no implementa liuhusi pakote rua ne’ebé envolve kompañia JOVA Construction Unipessoal, Lda., no Vage’el Unipessoal, Lda. Pakote dahuluk kobre seksaun Nagardjo–HoREX, ho kontratu US$4.735.021,55 no durasaun fulan 24.

Klik notísia relevante sira iha kraik hodi lee:

  1. https://tatoli.tl/2026/02/06/pm-xanana-gusmao-lansa-reabilitasaun-estrada-urbana-baukau/
  2. https://secoms.gov.tl/ix-governu-lansa-projetu-rehabilitasaun-estrada-urbana-iha-baucau-villa/
  3. https://tatoli.tl/2026/09/16/orsamentu-indemnizasaun-ba-afetadu-reabilitasaun-estrada-urbana-baukau-hamutuk-179-37488/

Jornalista: Natalino Belo

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!