Top

PNTL kontinua investigasaun ba kazu omisídiu agravadu Palomita durante oras 72

Komandante Komandu Polísia Nasionál Timor-Leste Munisípiu Dili, Komisáriu Asistente Polísia Orlando Gomes. Imajen TATOLI/Natalino Costa

DILI, 19 Novembru 2026 (TATOLI) – Komandante Polísia Nasionál Timor-Leste (PNTL) Munisípiu Dili, Superintendente Xefe Polísia, Orlando Gomes, informa katak PNTL kontinua halo investigasaun durante oras 72 hodi rekolla evidénsia sira kona-ba kazu omisídu agravadu ne’ebé envolve suspeitu ho inisiál JDRDC, ne’ebé deskonfia oho vítima Palomita Gusmão Guterres, iha loron 18 Novembru, iha aldeia 12 Outubru, Tasi-Tolu, suku Komoro, postu administrativu Don Aleixo, munisípiu Dili.

Nia esplika kronolojia akontesimentu ne’e katak, to’o agora seidauk iha informasaun loloos kona-ba motivu loloos krime ne’e. Maibé, tuir informasaun preliminár ne’ebé PNTL hetan, akontesimentu hahú bainhira vítima sai eskola iha Dili Institute of Technology (DIT) no obrigada matebian atu sa’e motór atu bá Tasi-Tolu.

Depois, suspeitu lori vítima ba nia rezidénsia, no iha kuartu laran mak uza tudik sona vítima.

Komandante ne’e hatete katak aktu ne’e iha indikasaun planeadu. Maibé, tuir informasaun preliminár, matebian hakotu ona relasaun suspeitu, ne’ebé bele sai hanesan motive ba akontesimentu ne’e.

Nia informa katak kazu ne’e akontese purvola tuku 14h45 lokraik. Depois sona vítima iha kuartu laran, suspeitu bá kedas iha Eskuadra Polísia Don Aleixo hodi entrega an ba autoridade.

PNTL mobiliza kedas ekipa patrullamentu bá fatin akontesimentu hodi asegura evidénsia sira. Aleinde ne’e, polísia akompaña vítima bá Sntru Saúde Komoro. Tanba matebian nia kondisaun grave, ambulánsia transporta nia bá Ospitál Nasionál Guido Valadares (HNGV).

“Agora suspeitu ita asegura iha Eskuadra Don Aleixo. Ita halo identifikasaun no ohin lokraik ita submete kedas ba oras 72 no lori bá Kaikoli. Investigadór sira akompaña autópsia matebian, depois ita aprezenta ba Ministériu Públiku nune’e bele ba primeiru interogatóriu [iha tribunál]”, nia hatete iha Eskuadra Polísia Don Aleixo, ohin.

Investigór sira sei notifika mós suspeitu nia maluk ne’ebé ninia vídeo virál iha mídia sosiál, hodi presta deklarasaun no kompleta prosesu investigasaun.

“Serbisu investigasaun kontinua halo serbisu detallu hodi hatene motivu loloos”, nia dehan.

Nune’e, komandante apela komunidade atu bainhira haree ka hatene akontesimentu hanesan ne’e, informa lalais ba polísia hodi autoridade foti medida apropriada

Notísia relevante: Nurima kondena hahalok hamate Palomita Gusmão Guterres no husu atu reforsa intervensaun Estadu

Jornalista: Nelson de Sousa

Editora: Maria Auxiliadora 

 

Publisidade

Leave a Reply

Latest Post

error: Content is protected !!