Top

Finadu to’o 12 Novembru: Oekusi hakmatek, PNTL prepara seguransa ba 28 Novembru

Komandante PNTL iha RAEOA, Superentendente Xefe Polísia, Nicolau Francelino da Costa. Imajen TATOLI/Abílio Elo Nini

OEKUSI, 19 Novembru 2026 (TATOLI) – Komandu Polísia Nasionál Timor-Leste (PNTL) Rejiaun Administrativa Espesiál Oekusi Ambeno (RAEOA) felisita komunidade no sidadaun hotu iha Oekusi, tanba hatudu komportamentu di’ak durante selebrasaun Loron Matebian 02 Novembru to’o komemorasaun Loron Nasionál Juventude no Masakre Santa Krús 12 Novembru tinan ne’e.

 “Iha Novembru ne’e ita selebra loron boot rua, Loron Matebian 02 Novembru no Loron Nasionál Juventude 12 Novembru Masakre Santa Krús, ne’ebé kazu ka asidente akontese iha Oekusi, ita ko’alia loloos laiha,” Komandante PNTL Oekusi, Superintendente Xefe Polísia, Nicolau Francelino da Costa, informa ba jornalista sira iha salaun konvensaun Palaban Oekusi, ohin.

“Ida-ne’e hatudu katak ita-nia komunidade no entidade hatudu amizade no kooperasaun di’ak tebes, tanba laiha insidente no kazu krime ne’ebé akontese iha Novembru ne’e,” autoridade polisiál ne’e louva.

Prepara seguransa ba 28 Novembru iha Pássabe

Autoridade polísia ne’e informa mós kona-ba preparasaun Loron Proklamasaun Independénsia 28 Novembru, tinan ne’e Oekusi sei realiza iha Sub-Rejiaun Pássabe, tan ne’e Komandu PNTL sei asegura atu komemorasaun ne’e bele la’o ho seguru no trankuilidade.

 “Komando PNTL RAEOA preparadu no hasai ona planu operasaun seguransa, hahú kedas iha semana kotuk planu ne’e fó sai ona, katak sei asegura eventu hodi komemora Loron Proklamasaun Independénsia 28 Novembru ba dala-51 la’o ho pás, tanba tinan ne’e Oekusi sei hala’o iha Sub-Rejiaun Pássabe, Suku Abani, ne’ebé ita-nia efetivu tomak sei hatuun hotu inklui eskuadra haat,” nia hateten.

 Kontinua asegura fronteira husi kontra-bandu

 Aleinde ne’e, durante komemorasaun Loron Proklamasaun 28 Novembru, Komando PNTL Oekusi kontinua asegura liña fronteira sira, liliu kazu kontra-bandu. “Ita bele dehan katak Oekusi ne’e liña fronteira direita ho nasaun viziñu, ne’ebé kazu kontra-bandu sira baibain Komando PNTL asegura, durante ne’e la’o hela, maibé komando kontinua nafatin halo identifikasaun ba sasán kontra-bandu no halo investigasaun tanba nia prosesu ne’e ba iha Ministériu Públiku,” nia hateten.

Notísia relevante:Juventude ho komportamentu di’ak sai xave ba dezenvolvimentu nasionál

 

Jornalista: Abílio Elo Nini

Editór: Rafael Ximenes de A. Belo

Publisidade

Leave a Reply

Latest Post

error: Content is protected !!