Top

SEATOU simu ona relatóriu husi RAEOA: Merkadu Numbei nu’udar rai Estadu

IMG-20261118-WA0028

OEKUSI, 18 Novembru 2026 (TATOLI) – Sekretáriu Estadu Toponíma no Organizasaun Urbana (SEATOU), Germano Santa Bristes, informa katak Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejonál Terra no Propriedade submete ona relatóriu ba  iha SEATOU kona-ba estatutu rai iha merkadu Numbei no konfirma nu’udar rai Estadu.

“Antes ne’e ha’u rona katak, iha uma-kain rua ka haat lakohi koopera atu sobu sira-nia uma, kioske ka barrak, balun hateten dehan rai ne’e privadu, maibé husi parte terra, propriedade mai katak, rai ne’e Estadu, sira-ne’ebé la kumpre no la koopera ho desizaun sira-ne’e ita halo servisu de’it, hasai no muda, sira mós tenke kumpre ba ordén sira-ne’ebé iha,” hateten, Germano Santa Bristes iha suku Bobometo sub-rejiaun Oésilo, tersa ne’e.

Notísia relevante:Abitante 156 iha merkadu Numbei koopera ho Governu sobu rasik uma-kioske

Governante ne’e relembra fali katak, iha Marsu 2024, ekipa SEATOU atribui notifikasaun ba komersiante no okupante sira iha merkadu Numbei hamutuk uma-kain 156, atu hamamuk tanba Governu atu moderniza merkadu referidu.

“Iha tinan rua kotuk, ita mai ona, liliu ba merkadu Numbei, ita husu sira (negosiánte) atu koopera, no muda fali karaik, rai privadu ida, bainhira Autoridade RAEOA tau ona osan, harii fali merkadu foun mak foin muda fali negosiánte sira,” nia afirma.

Notísia relevante:SEATOU apela ba uma-kain haat iha merkadu Numbei atu hamamuk ona fatin

Abitante Armindo Pereira, nu’udar na’in ba rai iha merkadu Numbei, informa katak, totál okupante atu hala’o negósiu hamutuk uma-kain 100-resin antes ne’e hamamuk, inklui uma-kain haat ne’ebé konsidera rai ne’ebé sira hela nu’udar rai privadu.

“Ami ne’ebé hela iha merkadu ne’e iha uma-kain 100-resin, maibé ami uma-kain haat rai ne’e privadu, la’ós foin mak mai atu hela, maibé hela kedas iha 1974, merkadu ne’e mós seidauk mai, estrada haleu mós seidauk iha rai ne’e fuik hela ho ai-laran tuan,” nia hateten iha merkadu Numbei.

Entretantu, tuir dadus ne’ebé Ajénsia Tatoli,I.P asesu, husi Departamentu Komersiu Indústria no Ambiente Oekusi, rejista, totál negosiante nesesidade bázika hamutuk 110, fa’an roupa uzada (Obralan) 44, fa’an modo 151, fa’an bua-malus 34, fa’an gazoliña no gazoel naʼin-lima no fa’an roupa iha 46.

Notísia relevante:Autoridade RAEOA aloka rihun $120 hadi’a merkadu tradisionál Numbei

Jornalista: Abílio Elo Nini

Editór: Rafael Ximenes de A. Belo

 

Publisidade

Leave a Reply

Latest Post

error: Content is protected !!