Top

Autoridade RAEOA planeia loke departamentu peska iha ETARO

Diretór Diresaun Rejionál Edukasaun no Solidariedade Sosiál Oekusi, Vincêncio Cono. Imajen TATOLI/Abílio Elo Nini

OEKUSI, 18 Novembru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diresaun Servisu Rejionál Edukasaun, planeia atu loke departamentu peska iha Eskola Tékniku Vokasionál Rejiaun Oekusi (ETARO), nu’udar investimentu rekursu umanu ba futuru Oekusi.

Diretór Servisu Rejionál Edukasaun Oekusi, Vincêncio Cono, informa iha tinan sanolu liubá, Governu konsege loke eskola peska paralela ida iha suku Bene-Ufe sub-rejiaun Nítibe, maibé la eziste to’o tinan barak laiha ona kontinuasaun to’o ohin loron.

Tanba ne’e, iha mandatu Autoridade Atuál liuhusi Servisu Rejionál Edukasaun Oekusi, iha planu ba futuru sei loke de’it departamentu peska nian iha Eskola Tékniku Vokasionál Rejiaun Oekusi.

“Foin lalais edukasaun koordena ona ho ema na’in-rua, nu’udar espesialiddae ba área peska, ami ona diskusaun, ita agradese tanba ETARO, akreditadu ona, ita mesak ona la’ós filiál fali ona ba munisipíu seluk, ne’ebé ami diskute ona katak, ita tenke iha preparasaun ne’ebé sériu, tanba prosesu rekrutamentu ne’e mós tenke iha seriadade tanba husi parte tékniku espesiál ba peska nian difisíl atu buka, maibé na’in-rua ne’ebé ami koordena ona sira mós iha komitmentu,” nia hateten, ba jornalista sira iha Oekusi, ohin.

Notísia relevante:Grupu peskadór Aos-Ero iha Suku Lifau enfrenta problema ekipamentu tasi

Dirijente Edukasaun ne’e informa, planu ba futuru bele integra hamutuk ho ETARO nian, tanba eskola referida nia naran rua, Eskola Tékniku Agrikola Kay Rala Xanana Gusmão no Eskola Tékniku Agrikola Oekusi, entaun naran rua ne’e independente ona, bele loke tan de’it departementu ida kona-ba peska, maibé tenke haree no lee nafatin estatutu Eskola Tékniku Vokasionál husi Ministériu Edukasaun nian liliu Diresaun Jerál ba Eskola Tékniku Vokasionál nian.

“Planu ne’e nu’udar servisu ka traballu ida ba ami edukasaun atu bele esforsa, tanba ita Oekusi mós lokaliza iha tasi-ibun entaun rikusoin tasi nian ne’e bele hetan protesaun husi finalista estudante sira,” nia hateten.

Nia afirma katak, inisiativa ne’e tenke mai husi Autoridade RAEOA rasik, maibé tenke iha preparasaun másimu analítiku no tenke iha kuriozidade no preparasaun rekursu umanu hodi aprezenta iha Ministériu Edukasaun hafoin bele hetan lisensamentu loke departamentu peska ne’e. Tanba daudaun iha ETARO só departementu ida de’it ortikultura, pekuária no peska seidauk iha.

“Molok ita atu  loke, ita sei sosializa ba suku sira, eskola sira hotu, nune’e bele hetan informasaun no rekomendasaun, tanba ita lakohi akontese tan hanesan uluk harii ona iha Nítibe, maibé ikusmai abandona no la eziste to’o ohin loron,” nia hateten.

Notísia relevante:Suku ualu iha Oekusi alvu ba programa joven partisipa iha peska

Jornalista: Abílio Elo Nini

Editór: Rafael Ximenes de A. Belo

 

Publisidade

Leave a Reply

Latest Post

error: Content is protected !!