F-FDTL hasa’e koñesimentu estudante Oekusi kona-ba partisipasaun feto iha vida militár

OEKUSI, 17 Novembru 2026 (TATOLI) – Komando FALINTIL-Forsa Defeza Timor-Leste (F-FDTL) liuhusi Diresaun Polítika Defeza Nasionál, tersa ne’e halaʼo sensibilizasaun hodi hasa’e koñesimentu estudante sira kona-ba partisipasaun feto ba vida militár iha Eskola Sekundária Tékniku Vokasionál (ETV) Palaban Rejiaun Administrativa Espesiál Oekusi Ambeno (RAEOA).
Tenente kolonel F-FDTL, Valério Valentino, atuál Diretór Polítika Defeza Nasionál, esplika katak Ministériu Defeza iha planu atu hakbesik an ba juventude, hodi fahe informasaun aprofunda sira-nia komprensaun kona-ba vida militár, liliu kona-ba papél no oportunidade ba feto sira.
Nia hateten, objetivu prinsipál husi sensibilizasaun neʼe atu hasaʼe koñesimentu estudante sira kona-ba profisaun militár, inklui oportunidade no partisipasaun feto iha instituisaun defeza nasionál.
“Ida-neʼe oportunidade tanba pursentajen partisipasaun feto iha vida militár nian ki’ik tebes, nuneʼe Ministériu Defeza hakarak estudante sira komprende diʼakliu kona-ba dalan atu tama no kontribui iha área militár, tan neʼe mak ita mai hakbesik ba estudante sira, atu sira bele komprende oinsá atu partisipa iha vida militár,” nia hateteten ba jornalista sira, hafoin hala’o sensibilizasaun iha ETV Palaban.
Notísia relevante:Feto F-FDTL partilla koñesimentu iha knaar militár
Autoridade Defeza nasionál ne’e, informa mós katak, sensibilizasaun neʼe hala’o aprezenta matéria prinsipál lima, hanesan edukasaun sívika, utilizasaun media sosial, partisipasaun feto iha vida militár prosesu atu tama ba militár no saúde.
Tuir nia, persisténsia esteriótipu jéneru no hanoin katak servisu balun pertense deʼit ba mane sai obstákulu ida-neʼebé bele limita feto sira-nia oportunidade atu partisipa iha profisaun neʼebé iha kapasidade atu halaʼo.
Tanba neʼe, nia konsidera importante atu hasaʼe koñesimentu ba juventude sira liuhusi sensibilizasaun, atu komprende katak iha sosiedade modernu, feto sira mós iha oportunidade atu kontribui iha área servisu oioin, inklui vida militár.
“Númeru partisipasaun feto iha vida militár neʼebé kiik, laʼós deʼit tanba diskriminasaun, maibé tanba limitasaun neʼebé relasiona ho kostume no kondisaun pesoal, dalaruma feto sira la tuir kompetisaun, no balun neʼebé tuir kompetisaun la konsege pasa iha teste fíziku, saúde no prosesu seluk,” nia afirma.
Notísia relevante:Feto Timor-Leste: Tinan 50 luta no sakrifísiu, igualdade no inkluzaun sai nafatin dezafiu
Iha fatin hanesan, Diretór Servisu Rejional Edukasaun, Vincêncio Cono, agrade ba Ministériu Defeza liliu komando F-FDTL tanba sensibilizasaun kona-ba partisipasaun feto iha vida militár neʼe sai inisiativa dahuluk neʼebé halaʼo liuhusi área edukasaun iha RAEOA.
Tuir nia, estudante sira-neʼebé hetan koñesimentu iha eskola, balun bele kontinua sira-nia estudu iha nível universitáriu, maibé liuhusi sensibilizasaun neʼe, bele haburas interrese no komprensaun kona-ba profisaun militár.
“F-FDTL laʼós fatin atu buka kargu, maibé profisaun ida-neʼebé presiza dedikasaun, preparasaun no responsabilidade, saúde mak sai prioridade liu, tan ne’e alin sira-ne’ebé ohin rona ona informasaun, tenke hahú preparaan,” nia apela.
Diretór Eskola Tékniku Vokasionál Palaban (ETV), José António Oqui, orgullu, tanba oportunidade di’ak ba estudante sira kona-ba partisipasaun feto iha vida militár, tan ne’e estudante sira presiza utilizasaun mídia sosiál ho étika, seguru no dignidade, no importánsia atu mantein saúde diʼak.
“Haʼu-nia esperansa ba sosializasaun neʼe ba iha futuru forsa defeza sei sai kualidade liu, tanba hetan ona sosializasaun ka informasaun neʼebé enkoraja tebes joven no estudante sira oinsá atu prepara an kona-na saida mak atu hasaʼe sira-nia kapasidade liuhusi formasaun formál no formál,ˮ nia hateten.
Jornalista: Abílio Elo Nini
Editór: Rafael Ximenes de A. Belo

