Top

ETV Palaban iha Oekusi promove ai-han tradisionál  iha ezame prátika kulinária

IMG-20261118-WA0009

OEKUSI, 17 Novembru 2026 (TATOLI) – Estudante na’in-44 husi Eskola Sekundáriu Tékniku Vokasionál (ETV) Palaban liuhusi kursu turizmu klase klase 10º ano, iha  Rejiaun Administrativa Espesiál Oekusi Ambeno (RAEOA), tersa ne’e, ezame prátika kulinária hodi promove ai-han tradisionál ne’ebé bei-ala sira husik hela atu kontinua prezerva ba jerasaun foun.

Ezame prátika ne’e, abertura direita husi Diretór Servisu Rejionál Edukasaun Oekusi, Vincêncio Cono, akompaña mós husi Tenente kolonel F-FDTL,  Valério Valentino, atuál Diretór Polítika Defeza Nasionál, ne’ebé apresia ba dedikasaun estudante na’in-44, tanba konsege hala’o ezame ho susesu no hatudu progresu signifikante iha sira-nia área espesialidade.

“Apresia tebes ba atividade ne’e, tanba estudante sira hatudu sira-nia abilidade no kriatividade hodi prepara no aprezenta menu oioin, ne’ebé kombina reseita ai-han lokál tradisionál Oekusi nian ho téknika kulinária modernu, ita tenke konserva nafatin ai-han lokál sira tanba uluk ita avo sira moris husi ai-han sira-ne’e, ohin ita jerasaun kontinuadór tenke promove nafatin nu’udar identidade,” nia hateten iha ETV Palaban, tersa ne’e.

Notísia relevante:UPIJIS Oé-Cusse realiza formasaun kulinária hodi promove gastronomia lokál

Iha biban ne’e, dirijente edukasaun hamutuk ho konvidadu sira, hala’o observasaun direta ba meza aprezentasaun ida-idak hodi haree kualidade, ijiéne, no estétika husi ai-han ne’ebé estudante sira prepara.

“Inisiativa ezame prátika hanesan ne’e konsidera importante tebes iha ensinu tékniku vokasionál tanba bele integra koñesimentu teóriku iha saladeaula ho prátika reál, hodi prepara estudante sira ba merkadu traballu,” nia afirma.

Notísia relevante:Tenke Hatudu Identidade Liuhusi Ai-han Lokál

Diretór Eskola Tékniku Vokasionál Palaban (ETV), José António Oqui, informa, ezame kompeténsia prátika kulinária ne’e, atu avalia abilidade, kreatividade no koñesimentu estudante sira-nian, hodi prepara sira atu bele aplika kapasidade ne’ebé aprende iha eskola ba oportunidade servisu no negósiu iha futuru.

Nia afirma, sistema aprendizajen iha kursu sira, estudante sira simu matéria teoria no prátika, prosesu aprendizajen ne’e iha alokasaun 30% ba teoria no 60% ba prátika, atu estudante sira la’ós de’it komprende matéria iha sala aula, maibé iha mós abilidade atu aplika iha prátika.

“Ezame hakerek remata ona, no agora eskola hala’o avaliasaun kompeténsia prátika atu haree estudante sira-nia abilidade, kreatividade, koñesimentu no kapasidade atu esplika oralmente prosesu servisu ne’ebé sira halo,” nia hateten.

José António Oki hein katak, ezame kompeténsia prátika ne’e bele ajuda estudante sira atu sai profisionál ne’ebé iha kapasidade, kreatividade no konfiansa atu aplika sira-nia koñesimentu iha moris loroloron no kontribui ba dezenvolvimentu turizmu no ekonomia lokál.

Jornalista: Abílio Elo Nini

Editór: Rafael Ximenes de A. Belo

 

Publisidade

Leave a Reply

Latest Post

error: Content is protected !!