OÉ-CUSSE, 14 Agostu 2024 (TATOLI) – Unidade Promosaun Igualdade Jéneru (UPIJIS), ne’ebé tutela iha Gabinete Prezidente Autoridade Rejiaun Administrativa Espesiál Oé-Cusse Ambeno (RAEOA), organiza formasaun kulinária ba grupu Ema ho Defisiénsia (EhD), komunidade LGBTI no feto vulneravel sira ho tema “Hakbiit Ekonomia Feto no Família Husi Formasaun Ai-han Lokál” ho objetivu atu promove gastronomia lokál.
Koordenadór UPIJIZ , Inácio Cebo, informa katak programa prinsipál iha formasaun te’in ai-han lokál ne’e realiza durante loron tolu, hahú iha kuarta to’o sesta-feira, hodi fó oportunidade ba feto sira atu prátika no hatudu sira-nia abilidade, nomós promove partsipasaun feto sira-nian iha desenvolvimentu komunitáriu.
“[Te’in] ai-han lokál ne’e dezde bei-ala sira-nia tempu mak hanesan halo ai-farina kukus [Lakutobe]. Ita haree situasaun reál iha Oé-Cusse ema fa’an sate, ikan, entaun produtu lokál sira-ne’e ema ladún promove maka Gabinete Prezidente Autoridade promove produtu ne’e liuhusi grupu sira”, Inácio Cebo dehan iha Santa Rosa, ohin.
Formasaun ba grupu sira ne’e fahe ba parte rua, teoria no prátika, tanba objetivu husi formasaun ne’e atu estimula kriatividade inan-feton sira-nia no kontribui ba promove igualidade jéneru no inkluzaun, hametin kapasidade feto sira-nia atu hatán ba dezafiu ekonomia no sosiál iha komunidade, liuhusi aktividade sira hanesan kria auto-empregu no auto-konfiansa.
Asesora ba Igualdade Jéneru Mérita de Jesus Marques, nu’udar mós koordenadór ba Sosiedade Sivíl RAEOA, espera katak depoizde formasaun ne’e grupu sira bele halo asaun, katak sira bele promove iha sosiedade saida mak aprende ona hanesan rezultadu husi formasaun nian.
“Ita lakoi kompete ho restaurante boot, maibé ita promove feto maluk sira atu mai ho sira-nia negósiu ne’ebé ki’ik, úniku no ema hotu interese atu hola, liuliu ita eleva produtu lokál”, katak.
Ba atividade ne’e, UPIJIS gasta osan hamutuk $2.300, ne’ebé prevee ona iha Orsamentu Jerál Estadu (OJE) 2024 liuhusi Programa Subvensaun Públika hodi disponibiliza formasaun durante loron tolu.
Jornalista: Abílio Elo Nini
Editora: Maria Auxiliadora
