DILI, 23 setembru 2021 (TATOLI)—Feto FALINTIL Forsa Defeza Timor-Leste (F-FDTL), realiza semináriu ho tema kapasitasaun promosaun feto F-FDTL, hodi fahe koñsimentu ba knaar militár.
Xefe Estadu Maiór F-FDTL, Tenente Jenerál, Lere Anan Timur, konsidera semináriu ne’e importante atu bele partilla koñesimentu kle’an ba membru feto sira bele hatene didi’ak kna’ar iha instituisaun no família.
Notísia relevante:Xefe Estadu konkorda koloka F-FDTL iha fronteira
“Feto F-FDTL sei iha difikuldade kona-bá igualidade jéneru no númeru seida’uk bo’ot, maibé futuru hanoin ona atu aumenta,” Lere Anan Timur, hateten iha Kuartél Jenerál Fatuhada, kinta ne’e.
Komandu mós hanoin ona atu kria departamentu feto iha F-FDTL, nune’e hakle’an boot liu tán feto sira nia kapasita hanesan servidór di’ak liu-tan ba nasaun.
Iha fatin hanesan, Responsável Jéneru F-FDTL, Tenente, Marquita da Cunha, hateten semináriu ne’e foin realiza ba dahuluk ho objetivu atu partilla koñesimentu no knaar ho responsabilidade ba estabelesimentu jénereu iha instituisaun, nune’e bele kontribui hala’o knaar di’ak liu-tan.
Agora iha efetivu feto F-FDTL hamutuk 234, no semináriu aprezenta matéria kona-bá karreira feto iha militár no planeamentu familiár.
Oradór sira mai hosi Amérika, Austrália, Veterana, UN Women, Sekretáriu Estadu Igualidade Jéneru no F-FDTL rasik.
Jornalista: Nelson de Sousa
Editór: Cipriano Colo
