Kooperasaun entre Timor-Leste no Austrália kontinua hametin kualidade edukasaun
DILI, 06 Novembru 2026 (TATOLI)—Ministériu Edukasaun (ME) hato’o agradese no apresiasaun ba Governu Austrália, liuhusi Embaixadora Austrália iha Timor-Leste, Caitlin Wilson, ba kooperasaun ne’ebé hala’o hamutuk durante tinan tolu, liuliu iha área ensinu báziku no hadi’a kualidade edukasaun iha Timor-Leste.
Ministra Edukasaun, Dulce de Jesus Soares, hateten katak durante períodu kooperasaun ne’e, Governu Austrália fó apoiu iha área importante sira hanesan ensinu pré-eskolár, formasaun profesór no inspetór eskola, jestaun saladeaula, dezenvolvimentu kurríkulu no inspesaun eskolár.
Nia subliña katak apoiu hirak-ne’e fó kontribuisaun importante ba hadi’a sistema edukasaun iha Timor-Leste, liuliu iha nivel ensinu báziku.
“Tanba ne’e, ha’u lori naran profesór no estudante sira atu hato’o agradese ba Governu Austrália, liuhusi servisu ne’ebé Embaixadora hala’o iha Timor-Leste durante nia mandatu tinan tolu,” Ministra Dulce de Jesus Soares dehan iha Vila Verde, Sesta ne’e.
Nia aumenta katak Ministériu Edukasaun fiar katak embaixadór foun ne’ebé sei mai troka Caitlin Wilson sei kontinua kooperasaun ne’ebé hahú ona durante períodu anteriór.
Iha parte seluk, Embaixadora Austrália, Caitlin Wilson, konsidera enkontru ho Ministériu Edukasaun nu’udár priviléjiu boot atu reflete filafali kooperasaun entre Governu Timor-Leste no Austrália durante tinan tolu nia laran.
Nia afirma katak enkontru ne’e sai mós oportunidade atu diskute kualidade edukasaun iha Timor-Leste, inklui programa edukasaun foun ne’ebé sei implementa iha futuru.
“Programa foun ne’e sei fó atensaun liuliu ba área ensinu báziku no kontinua servisu kooperasaun ne’ebé governu rua hahú ona iha períodu anteriór,” nia informa.
Embaixadora Caitlin Wilson mós hato’o agradese ba Ministériu Edukasaun tanba kolaborasaun ne’ebé hala’o hamutuk durante nia mandatu. Nia afirma katak servisu kooperasaun sira hala’o di’ak tuir planu ne’ebé estabelese ona.
Kontestu
Kooperasaun entre Timor-Leste no Austrália iha área edukasaun nu’udár parte ida hosi parseira dezenvolvimentu bilaterál ne’ebé foka ba hadi’a asesu no kualidade edukasaun bázika. Governu Austrália, liuhusi programa Partnership for Human Development (PHD), apoiu Governu Timor-Leste atu hametin sistema edukasaun, hadi’a rezultadu aprendizajen estudante sira, no dezenvolve kapasidade lideransa eskolár no profesór sira. Programa ne’e mós apoia edukasaun inkluziva, inklui hadi’a prátika hanorin ba labarik sira ho defisiénsia.
Iha kooperasaun ne’e, programa Apoiu ba Lideransa, Mentória no Aprendizajen (ALMA) implementa hamutuk ho Ministériu Edukasaun, ho apoiu Governu Austrália. Programa ne’e fó-atensaun ba dezenvolvimentu profisionál diretór, koordenadór no profesór sira, liuhusi mentória no aprendizajen hamutuk, atu hadi’a lideransa eskolár no kualidade prosesu hanorin.
Iha parte seluk, reforma kurríkulu ensinu báziku mós sai prioridade importante iha dezenvolvimentu edukasaun nasionál. Ministériu Edukasaun afirma katak reforma ne’e buka asegura aprendizajen ne’ebé reflete identidade, lian no kultura Timor-Leste, no prepara estudante sira ba mundu modernu.
Klik notísia relevante sira iha kraik hodi lee:
1.Informasaun kona-ba apoiu Austrália ba edukasaun bázika, edukasaun inkluziva no hadi’a sistema servisu públiku iha Timor-Leste. Australia’s development partnership with Timor-Leste
2. Esplika programa Partnership for Human Development no apoiu ba dezenvolvimentu profesór, lideransa eskolár no edukasaun bázika. Quality services in Timor-Leste
3. Informasaun kona-ba programa formasaun, mentoria no dezenvolvimentu kapasidade profesór no lideransa eskolár. ALMA – Apoiu ba Lideransa, Mentoria no Aprendizajen
4. Ministériu Edukasaun Timor-Leste – Reforma Kuríkulu: Curriculum Reform
Jornalista: Osória Marques
Editór: Xisto Freitas da Piedade
