Estudante finalista na’in-22 iha Vikeke la marka prezensa iha Ezame Nasionál 2026

VIKEKE, 06 Novembru 2026 (TATOLI)—Servisu Edukasaun Munisípiu Vikeke rejista estudante finalista na’in-22 la marka prezensa iha Ezame Nasionál 2026. Estudante hirak-ne’e sei hein kalendáriu ezame segunda xamada, ne’ebé sei hala’o iha fulan-Novembru ne’e.

Xefe Departamentu Dezenvolvimentu Parke Eskolár husi Servisu Edukasaun Munisípiu Vikeke, Lourenço Soares, hateten katak estudante hirak-ne’e la konsege tuir ezame nasionál ne’ebé hala’o husi loron 19 to’o 22 fulan-Outubru 2026, tanba razaun oioin, inklui problema saúde no estudante balun ne’ebé lakohi tuir.

“Nune’e, estudante sira-ne’ebé la partisipa iha ezame nasionál ne’e, balun tanba moras no balun seluk lakohi tuir. Maibé, iha ezame segunda xamada atu fó oportunidade fali ba sira atu tuir ezame. Ami seidauk simu kalendáriu ba ezame segunda xamada ne’e. Ami hein de’it Ministériu Edukasaun haruka mai, depoiz mak ami sei fó-sai informasaun ba públiku,” Lourenço Soares hateten ba TATOLI iha Postu Administrativu Vikeke Vila, Sesta ne’e.

Lourenço subliña katak, to’o agora, Servisu Edukasaun Munisípiu Vikeke seidauk simu oráriu ka kalendáriu ofisiál ba ezame segunda xamada. Nia esplika katak estudante sira-ne’ebé la konsege tuir ezame iha oportunidade dahuluk sei bele hetan oportunidade atu tuir fali, tuir kalendáriu ne’ebé Ministériu Edukasaun sei determina.

“Ezame segunda xamada ne’e oportunidade ida tan ba estudante sira atu tuir ezame. Maibé, se ezame segunda xamada ne’e liu tiha no estudante sira kontinua la partisipa, sira tenke hein fali oportunidade atu tuir ezame iha tinan 2027,” nia akresenta.

Tuir dadus husi Servisu Edukasaun Munisípiu Vikeke, estudante Ensinu Báziku Sentrál (EBC-sigla portugeza) na’in-13 mak la marka prezensa iha ezame nasionál, ne’ebé mai husi eskola ualu. Estudante hirak-ne’e inklui EBC Kabira-Oan na’in-tolu (3), EBC Lakluta na’in-rua (2), EBC Santu António Lakluta na’in-rua (2), EBF Uma-Tolu na’in-rua (2), EBC 07 Uatulari na’in-ida (1), EBF Malurukomu na’in-ida (1), EBF Hau-Oli na’in-ida (1) no EBC 30 Agustu Ossolequimeta na’in-ida (1).

Enkuantu, iha nivel Ensinu Sekundáriu Jerál, estudante finalista na’in-sia (9) mak la marka prezensa iha ezame nasionál. Sira maihusi eskola lima, hanesan ESJ Kalixá na’in-ida (1), Sekundáriu Filiál Veteranu Makadike na’in-haat (4), ESJ Filiál Vesoru na’in-ida (1), ESJ Santu António Lakluta na’in-rua (2) no ESJ 04 Setembru na’in-ida (1).

Tuir dadus husi Servisu Edukasaun Munisípiu Vikeke, estudante finalista na’in-2.943 mak partisipa iha Ezame Nasionál 2026. Númeru ne’e kompostu husi estudante Ensinu Báziku na’in-1.563, estudante Ensinu Sekundáriu na’in-1.273 no estudante Ensinu Sekundáriu Tékniku-Vokasionál (ESTV) na’in-107.

Kontestu

Ezame Nasionál 2026 ba estudante finalista iha Timor-Leste hahú iha loron 19 no ramata iha loron 22 fulan-Outubru. Iha Munisípiu Vikeke, estudante finalista na’in-2.965 rejistadu tuir ezame, kompostu husi estudante Ensinu Báziku na’in-1.576, Ensinu Sekundáriu na’in-1.282 no ESTV na’in-107.

Autoridade edukasaun munisipál informa antes ezame hahú katak estudante sira-ne’ebé la konsege tuir ezame iha oportunidade dahuluk tanba razaun justifikada, hanesan moras, dezastre ka situasaun espesífika seluk ne’ebé autoridade kompetente simu, bele hetan oportunidade atu tuir ezame iha Novembru, tuir regra aplikável.

Klik notísia relevante sira iha kraik hodi lee:

1. Estudante finalista 2.965 iha Vikeke hahú ezame nasionál 2026
2. Edukasaun Vikeke rejista estudante 2.965 atu partisipa iha ezame nasionál

Jornalista: Vitorino Lopes da Costa

Editór: Xisto Freitas da Piedade