OEKUSI, 21 Jullu 2026 (TATOLI) – Grupu Peskadór Aos-Ero, iha aldeia Tula-Ika, suku Lifau sub-rejiaun Pante Makasar Rejiaun Administrativa Espesiál Oekusi Ambeno (RAEOA), enfrenta problema ekipamentu tasi nian atu fasilita sira ba atividade peska nian hanesan bero no rede.
Notísia relevante:Governu presiza kontrola fasilidade ne’ebé oferese ona ba peskadór sira iha Oekusi
Responsavel Grupu Peskadór Aos-Ero, Agustinho Aut, hateten katak problema ne’e sira enfrenta tinan barak ona. Kuandu atu hala’o atividade peska iha tasi, sira uza de’it bero tradisionál hodi he’an ho liman, ne’ebé fó risku ba vida bainhira hasoru laloran boot. Maibé tanba nesesidade família obriga, sira tenke esforsa hodi kontinua hala’o atividade peska iha tasi laran.
“Durante ne’e ami submete proposta ba serbisu agrikultura Oekusi, despoia kuandu iha enkontru ruma sira konvida ami ba partisipa, maibé to’o tepu atu fahe apoia, ami la hetan fali, ida-ne’e maka triste, tanba grupu barak sira hetan ona, só ami iha Aos-Ero maka seidauk hetan,” nia hateten ba jornalista sira iha suku Lifau, ohin.
Tanba ne’e, Agustinho Aut reprezenta nia maluk peskadór sira na’in-15, rekomenda ba Autoridade RAEOA liliu Diresaun Rejionál Agrikultura atu konsidera sira-nia proposta ne’ebé sira hatama dala barak ona.
“Ami sei lembra, uluk ekipa ida mai rekolla ona ami nia kartaun eleitorál sira, depois foti ona dadus kona-ba ami nia atividade, dehan sei hetan apoia, maibé agora tinan tolu ona, ami nunka hetan buat ida,” nia hateten.
Iha fatin hanesan, Simão Coa reforsa tan katak grupu peskadór ne’e estabelese tinan neen ona, no kada loron sira fahe tarefa—balun he’an iha tasi no balun fa’an. Bainhira hetan rendimentu, sira tau hamutuk to’o tinan ida maka foin fahe ba membru.
“Ami uza de’it ami-nia forsa, nein apoia mákina hanesan ketintin no rede. Ami husu se bele tulun netik ami, tanba osan ne’ebé hetan la sufisiente, tanba ami uza manual de’it, entaun atu hetan ikan mós uitoan de’it, sei kompara ho sira-ne’ebé mákina laís liu ami,” nia hateten.
Notísia relevante:Kooperativa ba peskadór Oekusi sai prioridade mós ba Programa Movimentu Empreendedorizmu
Hatan ba preokupasaun sira-ne’e, Diretór Diresaun Rejionál Agrikultura, José Oqui, rekoñese katak grupu peskadór barak iha Oekusi seidauk hetan apoia, maibé Autoridade RAEOA sei esforsa tanba apoia ne’ebé Governu oferese la’o ho fazeadamente.
“Klaru, antes ne’e ita fó ona apoia ba grupu balu iha suku Costa no Nípani inklui Lifau rasik, tanba bainhira atu oferese apoia iha nia kritéria, tenki harii grupu la’ós apoia ba pesoál, depois apoia ne’e mós la’ós hothotu, tinan ida ita sei apoia uluk grupu haat ka lima no tinan tuir maka apoia tan, ne’ebé ekipa sei tuun fila-fali atu halo asesmentu, ba sira-ne’ebé seidauk hetan, sira-ne’ebé hetan ona, ita kontinua akompaña, atividade la’o ka la’e, sei la la’o ita foti no fó fa;I ba grupu seluk,” nia hateten.
Notísia relevante:Agrikultura sei harii rompon 15 fasilita peskadór sira iha Pante Makasar-Nítibe
Rekorde fali katak, iha fulan-Juñu 2026 ne’e, Governu liuhusi Ministériu Agrikultura Pekuária Peska no Floresta (MAPPF), distribui bero ho marka Eviota Santanai hamutuk unidade neen kompleta ho mákina ba grupu peskadór sira iha suku Costa, atu hametin setór peska no hasa’e kuantidade produsaun peskadór sira iha área kosteira maibé apoia ne’e la inklui grupu peskadór sira iha Aos-Ero.
Jornalista: Abílio Elo Nini
Editór: Rafael Ximenes de A. Belo
