Top

Hela husi 1974, Uma-kain haat iha Numbei simu indemnizasaun maske ko’a 10%

Depois hela kle'ur husi 1974, uma-kain haat iha merkadu tradisionál Numbei, ohin simu ona indemnizasaun ba sira-nia rezidénsia, maske RAEOA ko'a 10% ba kofre Estadu, tanba estatutu rai nian seidauk klaru. Imajen TATOLI/Abilio Elo Nini

OEKUSI, 20 Novembru 2026 (TATOLI) – Depois hela kle’ur husi 1974, uma-kain haat iha merkadu tradisionál Numbei, ohin simu ona indemnizasaun ba sira-nia rezidénsia, maske RAEOA ko’a 10% ba kofre Estadu, tanba estatutu rai nian seidauk klaru.

Pagamentu ne’e hala’o iha salaun edukasaun Oekusi, sesta ne’e, liuhusi transferénsia ba konta bankária benefisiáriu ida-idak, depois sira hetan despezu administrativu husi Sekretáriu Estadu Asuntu Toponímia Organizasaun Urbana (SEATOU).

Selu uluk uma, Rai hein desizaun Ministériu Justisa

Diretór Servisu Rejionál Terra Propriedade Oekusi, José Ase Neno Colo, hateten, pagamentu ohin ba de’it rezidénsia (uma). Kona-ba rai, sei hein desizaun finál husi Ministériu Justisa kona-ba estatutu rai ne’e.

Diretór Servisu Rejionál Terra no Propriedade Oekusi, José Ase Neno Colo. Imajen TATOLI/Abilio Elo Nini

“Ohin, ita selu ona uma-kain haat iha merkadu Numbei, maibé tenki koa 10% ba kofre Estadu husi valór pagamentu. Ita aplika ida ne’e depois sei halo akordu, iha futuru kuandu iha desizaun ona husi Ministru Justisa, define ona kona-ba estatutu rai ne’e hatudu katak rai ne’e privadu, entaun ami sei reembolsa fali 10%, tanba rai ne’e hela kleur ona,” nia hateten.

Tanbasá ko’a 10%?

Nia esplika, koa 10% ne’e define ona iha lei, katak sidadaun ida-ne’ebé hela iha rai Estadu, bainhira halo rekompensasaun ba sira-nia uma, tenke ko’a 10% husi totál kontratu pagamentu.

“Ezemplu uma ida selu ho valór rihun $10 entaun ko’a 10% husi valór ne’e, no direita tama ba kofre Estadu, ne’ebé pedidu atu koa 10% ne’e ita submete ona iha Prezidente Autoridade hodi fó despaixu ba iha parte finansa, nune’e prosesu pagamentu iha semana oin ne’e, ko’a kedas antes transferénsia osan ne’e ba konta bankaria idak-idak,” nia hateten.

Depois hela kle’ur husi 1974, uma-kain haat iha merkadu tradisionál Numbei, ohin simu ona indemnizasaun ba sira-nia rezidénsia, maske RAEOA ko’a 10% ba kofre Estadu, tanba estatutu rai nian seidauk klaru. Imajen TATOLI/Abilio Elo Nini

Komersiante seluk seidauk iha desizaun

Kona-ba afetadu komersiante sira seluk ne’ebé antes ne’e mós hetan despezu administrativu husi SEATOU, dadaun ne’e Autoridade RAEOA seidauk iha desizaun ruma tanba konsidera tama iha domíniu públiku Estadu nian.

“Terra Propriedade haree de’it ba rai, kona-ba uma no plantasaun, ne’e kompeténsia husi Obra Públika no servisu agrikultura, maibé desizaun atu selu, sei deside iha reuniaun membru Autoridade, hosi hasai deliberasaun maka foin prosesu ba pagamentu,” nia hateten.

Okupante: “Ami hela kedas husi 1974”

Reprezenta okupante sira, Armindo Pereira, orgullu tanba Governu konsidera ona hodi halo pagamentu.

“Ami ne’ebé hela iha merkadu ne’e iha uma-kain 100-resin, maibé ami uma-kain haat rai ne’e privadu, la’ós foin mak mai atu hela, maibé hela kedas iha 1974, merkadu ne’e mós seidauk mai, estrada haleu mós seidauk iha rai ne’e fuik hela ho ai laran tuan, ne’ebé ami agradese tanba ohin Governu bele selu ona, maske koa 10% importante selu netik, nune’e ami bele halo fali uma atu hela,” nia hateten.

Depois hela kle’ur husi 1974, uma-kain haat iha merkadu tradisionál Numbei, ohin simu ona indemnizasaun ba sira-nia rezidénsia, maske RAEOA ko’a 10% ba kofre Estadu, tanba estatutu rai nian seidauk klaru. Imajen TATOLI/Abilio Elo Nini

Entretantu, tuir dadus ne’ebé Ajénsia TATOLI,I.P asesu, husi Departamentu Komersiu Indústria no Ambiente Oekusi, rejista, totál negosiante nesesidade bázika hamutuk 110, fa’an roupa uzada (Obralan) 44, fa’an modo 151, fa’an bua-malus 34, fa’an gazoliña no gazoel na’in-lima no fa’an roupa iha 46.

Jornalista: Abílio Elo Nini
Editór: Rafael Ximenes de A. Belo

Publisidade

Leave a Reply

Latest Post

error: Content is protected !!