Top

Ekipa integradu durante vizita Oekusi fó asistensia saúde ba ema 740

Vise-Ministra Solidaridade Sosiál no Inkluzaun, Céu Brites hamutuk ho nia ekipa fahe ai-han ba komunidade iha Aldeia Malelat, Suku Malelat, Postu Administrativu Pasabe, Kinta (19/11/2026). Imajen TATOLI/Natalino Costa

OEKUSI 19 Novembru 2026 (TATOLI)—Ekipa integradu kompostu husi Ministériu Solidaridade Sosiál no Inkluzaun (MSSI), ekipa Saúde Rejionál husi Rejiaun Administrativa Espesiál Oekusi Ambeno (RAEOA) no Organizasaun Naun Governamentál (ONG) Fuan Naroman konsege fó konsulta jerál ba ema hamutuk 740 iha Postu Administrativu haat iha Oekusi, hahú loron 16 to’o 19 Novembru.

Durante loron-lima nia laran, Vise-Ministra Solidaridade Sosiál no Inkluzaun, Céu Brites akompaña husi Vise-Prezidente Komisaun F, Deputadu Luís Caldeira no Deputada Luiza Taiki inklui Reprezentante Prezidente Autoridade RAEOA halo vizita ba Suku Taiboko Postu Administrativu Pante Makasar, Suku Usi-Takenu Postu Administrativu Nítibe, Suku Bobometo Postu Administrativu Oesilo no Suku Malelat iha Postu Administrativu Pasabe.

“Servisu integradu iha konsulta ba nehan, konsulta ba fuan mai husi espesialista husi saúde rejiaun fó mós konsulta matan husi NGO Naroman, ita-nia Sentru Nasionál Reabilitasaun halo mós konsulta ba problema tilun, problema mobilidade, no seluk tan,” Vise-Ministra hato’o ba Ajénsia TATOLI bainhira ramata vizita komunidade iha Aldeia Malelat, Suku Malelat, Postu Administrativu Pasabe, Kinta ne’e.

Tuir dadus, iha loron dahuluk, iha Segunda (16/11), MSSI hamutuk ho ekipa integradu sira hahú fo asisténsia médika hodi fó konsulta gratuita ba ema hamutuk 270 iha Suku Taiboko, Aldeia Ulas, Pante Makasar.

Iha loron daruak, iha Tersa (17/11), ekipa integradu ba Postu Administrativu Nítibe bá Suku Usi-Takenu fó asisténsia ba ema hamutuk 150 iha Fatunababo.

Notísia relevante : MSSI realiza atividade fó konsulta saúde ba Abitante iha Suku Bobometo Oekusi

Iha loron datoluk, Iha Kuarta (18/11) ekipa integradu halo konsulta ba ema iha Suku Bobometo Postu Administrativu Oesilo, Aldeia Nankikan. Konsulta espesiál ba fuan, matan, tilun, inklui nehan no halo konsulta jerál ba ema 120.

Iha biban ne’e, husi Sentru Nasionál Reabilitasaun fó apoiu ekipamentu ba komunidade, liuliu ba sira ne’ebé presiza hetan apoiu emerjénsia hanesan ai-tonka no ekipamentu ba defisiénsia fízika hodi sira bele la’o, nune’e mós apoia ai-han hanesan foos no pakote komplementár.

Iha loron dahaat kinta (19/11), Vise-Ministra Solidaridade Sosiál no Inkluzaun Céu Brites ho ekipa integradu halo vizita bá Aldeia Malelat, Suku Malelat, Postu Administrativu Pasabe hodi fó asisténsia médika ba abitante 200.

“Ho programa ida-ne’e komunidade sente kontente tebes, ita mai fó ai-han no ida-ne’e fasilita sira hodi labele bá konsulta matan to’o iha Oekusi Vila. Ida-ne’e nu’udar programa Governu ne’ebé hakbesik serbisu ba povu. Ida-ne’e mak prioridade IX Governu,” nia afirma.

Governante ne’e dehan, programa ne’e la’ós mosu de’it, maibé iha ona planu ba área rurál ne’ebé susar atu asesu ba fasilidade saúde no asisténsia sosiál.

Vise-Ministra nota, Suku Malelat mak suku ne’ebé iha área rurál liu iha Postu Administrativu Pasabe Rejiaun Administrativa Oekusi Ambeno, maibé komunidade konsege asesu ona estrada no eletrisidade.

“Iha komunidade balun mak sei iha problema, mas ita haree IX Governu Konstitusionál loke dalan ba fatin hotu ne’ebé tinan oin mai ha’u fiar dalan sira asesu mai iha ne’e di’ak hotu hodi fasilita komunidade sira-nia movimentu,” nia katak.

Programa ne’e antes ne’e realiza iha Ataúru, nune’e mós sei kontinua ba munisípiu seluk.

Programa ne’e la’ós halo de’it iha Oekusi maibé antes halo ona iha Ataúru, nune’e sei kontinua ba munisípiu sira seluk.

Iha fatin hanesan, Xefe Suku Malelat, José Marques, agradese ba Vise-Ministra Céu Brites ho ekipa nia prezensa.

“Ami agradese tebes tanba ohin ne’e ha’u-nia povu iha suku bele halo tratamentu saúde gratuita husi Governu,” nia tenik.

Nune’e mós, Administradór Postu Administrativu Pasabe Paulino Marques, apresia ho Governu nia programa.

Jornalista     : Natalino Costa

Esditora        : Julia Chatarina

Publisidade

Leave a Reply

Latest Post

error: Content is protected !!