Top

MSSI realiza atividade fó konsulta saúde ba Abitante iha Suku Bobometo Oekusi

Profisionál saúde atende hela sidadaun ida halo konsulta matan iha ámbitu vizita Vise-Ministra Solidaridade Sosiál no Inkluzaun, Céu Brites hamutuk ho nia ekipa, iha Aldeia Nonkikan, Suku Bobometo, Postu Administrativu Oesilo, RAEOA, Kuarta (20/11/2026).Imajen TATOLI/Natalino Costa

OEKUSI 18 Novembru 2026 (TATOLI)—Vise-Ministra Solidaridade Sosiál no Inkluzaun, Céu Brites hamutuk ho nia ekipa husi ministériu no ekipa saúde, Kuarta ne’e, realiza atividade fó konsulta saúde gratuita no fahe ai-han bázika ba abitante iha Aldeia Nonkikan, Suku Bobometo, Postu Administrativu Oesilo, Rejiaun Espesiál Oekusi Ambeno (RAEOA).

Xefe Suku Bobometo, José Labi Caet, konsidera atividade ne’e di’ak tanba membru Governu tuun direta ba terrenu hasoru abitante sira.

“Ohin iha Suku Bobometo, Aldeia Nunkikan tuir dadus iha ema na’in-200 mak mai konsulta matan, tilun no fuan ho gratuita,” José Labi Caet, relata bainhira simu vizita Vise-Ministra Céu Brites iha Suku Bobometo.

Nia dehan, Suku Bobometo ne’e iha aldeia sia, maibé ohin tratamentu saúde no apoia ai-han iha Aldeia Nonkikan. Aldeia ne’e iha ema ho defisiénsia fízika na’in-36, ne’ebé balun hetan ona asisténsia sosiál.

“Ha’u rasik trata sira-nia dokumentu mai suku no sira asesu ona apoiu husi Governu liuhusi Ministériu Solidaridade Sosiál no Inkluzaun inklui idozu mós, nune’e sira kada fulan-tolu simu osan,” nia akresenta.

Tuir dadus, Suku Bobometo iha idozu hamutuk 156, ho totál populasaun 10.404 husi uma-kain 2.579.

Notísia relevante : Autoridade Lakluta apresia MSSI nia apoiu ai-han báziku ba família vulnerável na’in-300

Nune’e mós, Administradór Postu Administrativu, Oesilo Benditu Ulan, apresia ho Governu nia programa.

“Komunidade ohin halo tratamentu saúde inklui halo asaun karidade ba komunidade ne’ebé kbiit laek, la’ós dehan sira mak kiak, maizumenus ajuda ona sira loron-ida rua sira bele uza ba nesesidade bázika,” nia tenik.

Vise Ministra Solidaridade Sosiál no Inkluzaun, Céu Brites, hateten, servisu ne’e integradu.

“Ita bolu dala-ida maibé implementa hanesan atividade para iha loron-ida de’it, tanba sá ne’e Governu agora nia prioridade mak hakbesik ba povu sira. Hakbesik mak ida-ne’e halo konsulta buat hotu-hotu no sei fahe mós ai-han,” nia katak.

Vise-Ministra haktuir, iha konsulta ohin ne’e inan-aman, avo, inklui labarik kiik tenke konsulta tanba kiikoan hanesan horisehik iha Usi-Taku problema tilun la rona.

“Entaun sira na’in-rua tenke ba Dili para halo konsulta. Kuandu bá Dili hela iha Sentru Nasionál Reabilitasaun iha fatin ba toba, iha ai-han no konsulta ida de’it, imi sei la gasta osan ida-ne’ebé ohin tenke konsulta para haree sé maka problema tilun, matan para hadi’a saúde. Se imi la konsulta imi husik problema ne’e naruk, aban bainrua susar atu hadi’a moras. Sentru Nasionál Reabilitasaun mak sei mai tula imi bá Dili,” nia hato’o.

Atividade ne’e nu’udar MSSI nia programa prioridade, ne’ebé hakarak lori Governu nia serbisu besik liu ba povu, husi nível munisípiu to’o área rurál.

Programa konsulta gratuita ne’e Vise Ministra Solidaridade Sosiál no Inklusaun Céu Brites halo servisu koordenasaun ho Sekretáriu Rejionál no Sekretáriadu Asuntu Sosiál hodi fó asisténsia saúde ba komunidade sira hodi médiku sira fó konsulta matan, tilun no fuan ba komunidade.

Jornalista     : Natalino Costa

Editora          : Julia Chatarina

Publisidade

Leave a Reply

Latest Post

error: Content is protected !!