Hein tinan tolu, Afetadu 250 iha Oekusi simu ona kompensasaun $338.661,44

OEKUSI, 20 Novembru 2026 (TATOLI) – Depois hein tinan tolu, família afetadu 250 husi suku Cunha, Bobokase no Naimeko, ohin simu ona sira-nia direitu, ho total $338.661,44, husi projetu reabilitasaun estrada nasionál Tono-Oésilo.
Pagamentu ne’e hala’o iha salaun edukasaun Oekusi, sesta ohin, liuhusi transferénsia direta ba konta bankária benefisiáriu ida-idak, la’ós entrega osan cash hanesan tinan hirak liubá.

Notísia relevante:Autoridade RAEOA aprova rihun $300-resin indemniza afetadu ZEESM 289
Diretór Servisu Rejionál Terra Propriedade Oekusi, José Ase Neno Colo, hateten, valór ne’e kalkula bazeia ba $5 kada metro-kuadradu ba rai ne’ebé hetan afetasaun.
“Ohin, abertura pagamentu ba benefisiáriu 250 husi suku Cunha, Bobokase no Naimeko, ne’ebé hetan afetasaun husi reabilitasaun estrada nasionál husi Tono ba Oésilo iha tinan tolu liubá, ohin ita selu ho osan rihun $338.661,44, no dadus ne’e inklui pendente balu husi suku Costa no Nípani, ne’ebé pagamentu ne’e kada metro-kuadradu dollár $5,” nia hateten.
Nia esplika, verba ne’e mai husi Orsamentu Jerál Estadu (OJE) 2026 nian, ne’ebé aloka millaun $1-resin ba de’it pagamentu afetadu sira. Faze dahuluk ohin foka ba rai de’it. Faze tuir mai sei selu ba uma, kioske no plantasaun.
Notísia relevante:Autoridade RAEOA sei rekolla dadus afetadu ZEESM atu halo kompensasaun
Iha biban ne’e, Prezidente Autoridade RAEOA, Régio da Cruz Salu, konsidera pagamentu ne’e nu’udar obrigasaun Governu nian, hodi responde ba preokupasaun komunidade sira, ne’ebé hein tinan barak ona.

“Pagamentu ne’e nu’udar obrigasaun Governu, tanba inan-aman sira kontribui ona ba prosesu dezenvolvimentu, hodi oferese ona sira-nia patrimoniál hanesan rai, uma no plantasaun, agradese ba afetadu sira tanba ho pasiénsia hein tinan barak ona, ohin foin simu ita-boot sira-nia direitu,” nia hateten.
Nia enkoraja família afetadu sira atu utiliza valór kompensasaun ne’e ho di’ak, bele hadi’a moris no halo investimentu ba ekonomia iha futuru.
“Osan ne’ebé ohin simu ne’e montante bo’ot, ha’u espera imi bele sosa buat ruma, karreta motorizada, fó oan ba eskola, hadi’a uma no rai iha kooperativa, labele gasta de’it ba lia, ikus mai osan ne’e la investe ba ruma, no osan laiha valór,” nia fó hanoin.

Reprezenta família afetadu sira, Xefe Suku Naimeko, Marcos Liu, agradese ba Governu, bele konsidera nesesidade komunidade sira, tanba antes ne’e kontribui ona hodi oferese sira-nia rai, uma no plantasaun ba projetu estrada husi Tono ba Oésilo.
“Ita akompaña, durante komunidade sira la ejize tanba ohin ita nasaun ida ona, ita tenki kontribui ba prosesu dezenvolvimentu, maibé ohin ita agradese tanba Governu liuhusi Autoridade RAEOA fó ona rekoñesimentu hodi selu komunidade sira-nia direitu, ita espera polítika ne’e bele kontinua, tanba balu sei pendente,” nia hateten.
Notísia relevante:DRTP Oekusi aloka millaun $1 fó indemnizasaun ba rai no propriedade
Jornalista: Abílio Elo Nini
Editór: Rafael Ximenes de A. Belo

