Autoridade RAEOA aprova rihun $300-resin indemniza afetadu ZEESM 289
OEKUSI, 22 Setembru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), lideradu Régio da Cruz Salu, aprova ona verba rihun $300-resin, aloka husi Orsamentu Jerál Estadu (OJE) 2026, hodi halo pagamentu indemnizasaun ba komunidade afetadu 289, ne’ebé afeta husi projetu alargamentu estrada, iha inísiu implementasaun grande projetu Zona Ekonómia Espesiál Sosiál Merkadu (ZEESM) iha tinan 2014 liubá.
Diretór Servisu Rejionál Terra no Propriedade Oekusi, José Ase Neno Colo, informa katak komunidade afetadu 289 ne’e, nu’udar lista pendente, maioria iha sub-rejiaun Pante Makasar, hanesan suku Costa, Nípani, Bobokase no suku Naimeko.
“Iha tempu-badak, ita sei selu afetadu 289, maioria lista pendente husi suku Costa, no ida husi suku Nípani, nia rai mak halo konstrusaun ba klínika TBC iha tinan rua liubá to’o agora seidauk simu nia direitu ba rai nian, suku Bobokase no Naimeko inklui otél Oé-Upun, ne’ebé hetan afeta husi alargamentu estrada iha implementasaun projetu ZEESM 2014,” nia hateten iha Oekusi, ohin.
Dirijente ne’e esplika, husi afetadu 289 ne’e, Prezidente Autoridade RAEOA aprova ona sira-nia lista, entaun iha Setembru ne’e, sei submete pedidu ba Ministériu Finansa (MF) atu loke vendór, depoisde loke vendor iha Ministériu Finansa liuhusi Diresaun Finansa iha Autoridade RAEOA mak sei transfere fundu indemnizasaun ba númeru konta bankaria idak-idak nian.
Tanba pagamentu tinan ne’e, la’ós hanesan tinan hirak kotuk hodi selu direita, maibé tinan ne’e selu liuhusi númeru konta bankaria, tan ne’e maka prosesu kleur itoan, tenki ba loke vendór iha Ministériu Finansa.
“Orsamentu ne’e, Prezidente Autoridade RAEOA ona, rihun $300-resin tanba orsamentu aloka ba pagamentu afetadu iha Orsamentu Jerál Estadu (OJE) 2026 tinan ne’e hamutuk millaun $1-resin,” nia afirma.
Notísia relevante:Autoridade RAEOA sei rekolla dadus afetadu ZEESM atu halo kompensasaun
Xefe Suku Costa, Francisco Colo, espera presiza aselera ona prosesu pagamentu tanba komunidade afetadu sira hein tinan barak ona.
“Ita-nia esperansa ba Governu tenki prosesa ona, tanba dezde 2014, povu hein hela, sira kontribui ona maka oferese rai, uma no plantasaun hodi halo ba dezenvolvimentu, ne’ebé Governu mós presiza konsidera, maske bo’ot ka ki’ik importante selu netik sira, maibé presiza identifika didi’ak, terra proprirdade identifika rai, agrikultura ba plantasaun no parte obra públika ba uma sira-ne’ebé hetan afetadu,” nia hateten.
Notísia relevante: Autoridade RAEOA paga ona abitante afetadu ZEESM 107 ho valór rihun $591-resin
Jornalista: Abílio Elo Nini
Editór: Rafael Ximenes de A. Belo
