OEKUSI, 29 Dezembru 2025 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejionál Terra no Propriedade, segunda ohin, halo ona pagamentu indemnizasaun ba komunidade afetadu 107 ho verba rihun $591,184.40, ne’ebé aloka husi Orsamentu Jerál Estadu (OJE) 2025.
Komunidade afetadu 107 ne’e afeta iha prosesu alargamentu estrada iha inísiu implementasaun projetu Zona Espesiál Ekonomia Sosiál Merkadu (ZEESM) 2014, inklui sentrál EDTL power plant Sakato, otél Oé-Upun, Cae, ne’ebé mai husi suku Nípani, Kutete, Costa, Lalisuk no suku Cunha.
Notísia relevante:Autoridade RAEOA indemniza rai afetadu ba projetu ho kada metru² $5
Hafoin entrega, Prezidente Autoridade RAEOA, Régio da Cruz Salu, orgullu ho kontribuisaun komunidade, oferese rai no plantasaun ba prosesu dezenvolvimentu sein pagamentu uluk, maibé pasiénsia hodi hein prosesu pagamentu dezde 2014 to’o ohin loron.
“Povu Oekusi fuan osan mean. Tinan-10 silénsia hodi akompaña Governu hadi’a rai ne’e, sein ejizénsia. Ha’u membru autoridade dahuluk iha setór agrikultura, uluk ami mak ba husu ita, atu oferese rai no ai-oan atu loke luan estrada, koopera di’ak tebes, maske seidauk halo pagamentu, ohin ita tenke selu duni imi-nia direitu ida ho dignu, ida-ne’e mak sentidu kontribui povu Oekusi ba prosesu dezenvolvimentu iha inísiu RAEOA-ZEESM iha 2014,” nia hateten iha salaun Alfándega, ohin.
Autoridade másima Oekusi ne’e, apela, osan ne’ebé autoridade oferese nu’udar prezente ba natál tanba direitu komunidade nian, nune’e uza ba nesesidade atu hadi’a família no evita halo lia.
“Ne’e prezente natál husi Governu fó ba ita-boot sira. Agora ita-nia estrada kaber ona, pelu-menus ita-nia uma sira mós tenke di’ak, osan ne’ebé simu ho valór boot tebes, se bele hadi’a uma ou fó eskola oan sira, nu’udar futuru intelektuál Oekusi, labele simu osan ne’e gasta ba lia de’it, ikus mai rezultadu laiha,” nia fó hanoin.
Notísia relevante:Autoridade publika mapeamentu suku haat prepara indemniza rai afetadu ZEESM
Diretór Diresaun Rejionál Terra no Propriedade Oekusi, José Ase Neno Colo, relata, pagamentu ne’e diferente tanba uluk ho manuál maibé agora liuhusi númeru konta bankaria tanba bazeia rekomendasaun husi Ministériu Finansa, no pagamentu ne’e bazeia rezolusaun autoridade sesante, katak kada metru-kuadradu sei paga ho dolár $5.
“Afetadu 107 ne’e, pendente dezde 2014, sira-ne’ebé la konsege simu ohin tanba sei iha disputa, ekipa tékniku sei halo mediasaun ba parte rua, bainhira iha solusaun ona mak foin bele prosesa no balun presiza kompleta dokumentu, ne’ebé pagamentu ne’e bazeia metru-kuadru dollár $5, tuir akta deliberasaun autoridade sesante nian,” nia esplika.
Notísia relevante:Abitante 219 konfirma naran iha suku Costa molok hetan indemnizasaun
Jornalista: Abílio Elo Nini
Editór: Rafael Ximenes de A. Belo
