OÉ-CUSSE, 06 jullu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretariu Rejionál ba Asuntu Terra Propriedade, daudaun ne’e publika ona mapeamentu afetadu ba suku haat; Nípani, Costa, Cunha no Lalisuk hodi simu kompensasaun ba rai, ne’ebé hetan afeta iha implementasaun projetu Zona Ekonomia Espesiál Sosiál Merkadu Timor-Leste (ZEESM-TL).
Notísia relevante: Autoridade RAEOA aprova deliberasaun halo pagamentu ba afetadu projetu ZEESM
Sekretáriu Rejionál ba Asuntu Terra Propriedade, António Hermenegildo da Costa, hateten, publikasaun ne’e tau ona iha sede haat ba alargamentu estrada úrbana I hosi fronteira Sakato to’o eis merkadu Tono no ponte Noefefan.
“Publikasaun mapeamentu ne’e atu fó hanoin ba komunidade sira-ne’ebé afeta iha implementasaun projetu ZEESM, atu-bele partisipa, hatudu ba sidadaun hotu, kona-bá levantamentu kadastrál iha tinan hirak kotuk ne’e los ka lae, karik dadus iha mapeamentu ne’e klaru ona, ita kontinua halo pagamentu,” António Hermenegildo da Costa, ba Tatoli iha Oé-Cusse, kinta ne’e.
Mapeamentu ne’e publika ba rai de’it, la inklui ai-horis, tanba autoridade RAEOA halo ona pagamentu ba plantasaun dezde 2014 to’o 2018.
Nune’e períodu ba mapeamentu ne’e ho tipu rua, iha loron 90 válida ba suku Costa no Nípani, kabe ba sira-ne’ebé hetan ona levantamentu hosi Sistema Nasionál Kadastru (SNC, sigla portugés) maibé seidauk halo publikasaun.
“Tan ne’e ami publika, hahú hosi loron 05 juñu to’o loron 13 novembru 2023, no hosi novembru ba oin ita sei prosesa ba pagamentu,” nia katak.
Nune’e mós ba loron 30 válida ba suku Cunha no Lalisuk, hahú hosi loron 05 to’o loron 15 agostu 2023.
“Razaun tanba iha tempu ne’ebá, programa SNC halo ona levantamentu no publika ona, maibé seidauk hetan pagamentu, entaun iha agostu ba leten ita hahú prosesa ona ba pagamentu,” nia katak.
Autoridade ne’e fó-sai katak, pagamentu ne’e ferere ba rezolusaun Governu númeru 20/2014, loron 24 fevereiru, ho valór másima, metru-kuadradu másima dolar $3.
“Deklarante iha 1,192, bele aumenta no bele menus tanba iha dentru publikasaun karik iha disputa ruma, ita sei la avansa ba pagamentu tanba sei iha disputa, nia orsamentu ba pagamentu, tina kotuk iha ita prevee ona millaun $1.6,” nia informa.
Notísia relevante: PA RAEOA konsidera sertifikadu títulu rai bele tulun rezolve problema implementasaun projetu
Jornalista: Abílio Elo Nini
Editór: Evaristo Soares Martins
