OÉ-CUSSE 21 marsu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, segunda ne’e aprova ona deliberasaun númeru 2/2023, 24 fereveiru, ho valór másima atu halo pagamentu ba komunidade ne’ebé hetan afeta iha mega projetu Zona Ekonómia Espesiál Sosiál Merkadu Timor-Leste (ZEESM-TL) iha Oé-Cusse Ambeno.
Deliberasaun ne’e, aprova liuhosi reuniaun membru Autoridade, ne’ebé aprezenta hosi Sekretáriu Rejionál ba Asuntu Terra Propriedade, António Hermenegildo da Costa, hafoin remata konsultasaun ho Ministériu Justisa estudu komparativu ba pagamentu iha munisipíu Covalima no Aileu foin lalais ne’e.
“Autoridade RAEOA aprova ona mós deliberasaun atu oinsá bele ita-bo’ot sira-nia rai mak afeta estrada nasionál Pante Makasar-Nítibe tinan ida-ne’e ita bele selu ona, esforsa ida-ne’e mai hosi membru Autoridade lidera hosi Prezidente Autoridade RAEOA, ne’e ita hotu parabéns ba membru Autoridade tanba konsege aprova ona deliberasaun ne’e,” António Hermenegildo da Costa, informa, iha suku Taiboko, sub-rejiaun Pante Makasar.
Ezekutivu ne’e agradese tanba deliberasaun ne’e komunidade Oé-Cusse hein tinan barak ona, dezde implementasaun ZEESM iha 2014, maibé iha 2023 Autoridade RAEOA konsulta ho Governu Sentrál, no mós halo observasaun ba referénsia hosi pagamentu komunidade afetadu iha munisipíu Covalima no Aileu.
“Ikus mai ita konsege diskute no aprova deliberasaun ne’e, entaun inan-aman sira labele triste, projetu ba alargamentu kona-bá rai, Governu sei selu tuir baze ne’ebé aprovadu ona, agora ita selu uluk alimentasaun, tanba foin daudaun ateru estrada afeta ba ai-haan produtiva sira hanesan haree, batar, fore-mungu no lakeru,” nia afirma.
Ekipa responsável kona-bá pagamentu plantasaun, agora daudaun elabora hela dadus, entaun iha tempu badak, autoridade sei tún iha terrenu hodi halo pagamentu ba ai-oan sira hanesan; kulu, nú, marunge, derok, hás, ai-kameli, jati, káfe, no seluk tán.
“Tán ne’e ami agradese ba komunidade suku Taiboko, Lifau nia kolaborasaun durante ne’e, to’o ohin loron estrada nasionál ne’e kontinua la’o di’ak tanba imi kontribui oferese, hodi hein pagamentu ikus,” nia orgullu.
Iha biban ne’e, membru Autoridade ne’e informa ba komunidade sira, ekipa hosi Diresaun Terra Propriedade sei kontinua halo levantamentu dadus hahú hosi aldeia Maquelab, suku Taiboko to’o Oénunu, suku Suni-Ufe.
Entretantu, valór pagamentu ba komunidade afetadu sira iha Oé-Cusse, Autoridade RAEOA mantein uza referénsia Governu Sentrál nian, ne’ebé antes ne’e halo ona pagamentu ba komunidade afetadu sira iha munisipíu Covalima no Aileu.
Projetu ne’e Autoridade RAEOA, hahú halo lansamentu iha 19 agostu 2022 ho distánsia konstrusaun estrada nasionál pakote I ne’e hamutuk kilómetru 18, hahú hosi ponte Noefafan, suku Lifau, envolve suku Taiboko, sub-rejiaun Pante Makasar to’o Oénunu, suku Suni-Ufe, sub-rejiaun Nítibe.
Projetu reabilitasaun estrada nasionál, ezekuta hosi empreza internasionál PT. Waskita Karya, Tbk, ho valór kontratu millaun $23, ne’ebé autoridade RAEOA prevee hosi Orsamentu Jerál Estadu (OJE) 2022 ho durasaun servisu fulan 18.
Notísia relevante:RAEOA prepara ona deliberasaun paga rai afetadu ZEESM
Jornalista : Abílio Elo Nini
Editór : Evaristo Soares Martins
